జమ్మూకశ్మీర్లోని జైషే మహమ్మద్ ఉగ్రమూకల శిబిరాలను నేలమట్టం చేయటంలో ప్రధాన అస్త్రం... మిరాజ్-2000 యుద్ధ విమానం. బారాకోట్లో భారత వైమానిక బాంబుదాడులను... పాక్ ఉగ్రమూకల పుల్వమా దాడికి ప్రతీకారంగా భావించిన యావత్ భారతం సంబరాలు జరుపుకుంది.
అమర వీరుల చిత్రపటాలను ప్రదర్శిస్తూ, టపాసులు కాలుస్తూ... ఇలా ఎవరికి నచ్చిన విధంగా వారు విజయోత్సవాలు జరుపుకున్నారు. రాజస్థాన్లోని నాగౌర్ జిల్లా డాబ్దా గ్రామానికి చెందిన మహవీర్ సింగ్ కుటుంబం భారత వైమానిక దాడుల విజయాన్ని మరోలా జరుపుకున్నారు.
మంగళవారం ఉదయం 3 గంటల 30 నిమిషాలకు పాక్ ఉగ్రమూకల స్థావరాలపై వైమానికి దాడులు జరిగాయి. అదే సమయంలో మహావీర్ భార్య సోనమ్... పండంటి మగబిడ్డకు జన్మనిచ్చింది. భారత మెరుపుదాడుల్లో ప్రధాన అస్త్రంగా నిలిచిని మిరాజ్ విమానాన్ని ఎప్పటికీ గుర్తుంచుకునేలా తన బిడ్డకు 'మిరాజ్ సింగ్ రాఠోడ్' అని పేరు పెట్టారు.
మహవీర్ సింగ్ తమ్ముడు భూపేంద్ర సింగ్ ప్రస్తుతం ఇండియన్ ఎయిర్ ఫోర్స్లో విధులు నిర్వర్తిస్తున్నారు. మహవీర్ కూడా ఆర్మీలో బాధ్యతలు నిర్వర్తించి రిటైరయ్యారు. ఇలా వీరి కుటుంబం దేశ భద్రత కర్తవ్యాల్లో మమేకమవడం వల్ల ఈ పేరు పెట్టేందుకే నిర్ణయించామని కుటుంబీకులు తెలిపారు. స్థానిక యువత రక్షణ రంగంలో ఉద్యోగాలు సాధించేందుకు మిరాజ్ పేరు స్ఫూర్తిగా నిలుస్తుందని ప్రకటించారు.
