"శాంతిమార్గమే మిన్న "

భారత్​-పాకిస్థాన్​.. చర్చల ద్వారా సమస్యలు పరిష్కరించుకోవాలని విజ్ఞప్తి చేశాయి ప్రపంచ దేశాలు. ఇరు దేశాలు సంయమనం పాటించాలని కోరాయి.

భారత్​, పాకిస్థాన్​ దేశాలు సంయమనం పాటిస్తూ, సరిహద్దుల్లో సైనిక చర్యలను నిలిపివేయాలని అమెరికా, రష్యా, బ్రిటన్​, చైనా​, నేపాల్​ సహా పలు దేశాలు సూచించాయి. శాంతిమార్గంలో సమస్యలను పరిష్కరించుకోవాలని కోరాయి.

జమ్మూకశ్మీర్​లోని సైనిక స్థావరాలే లక్ష్యంగా పాకిస్థాన్​ యుద్ధ విమానాలు భారత గగనతలంలోకి అక్రమంగా చొరబడడం వల్ల బుధవారం సరిహద్దుల్లో పరిస్థితులు మరింత ఉద్రిక్తంగా మారాయి. పాక్​ యుద్ధ విమానాలను తిప్పికొట్టింది మన వాయుసేన. పాక్​ విమానాలు తోకముడిచి వెనక్కితిరిగి వెళ్లాయి. భారత్​కు చెందిన ఓ పైలట్​ను అదుపులోకి తీసుకున్నామని పాక్​ ప్రకటించడం మరింత ఉద్రిక్తతలకు కారణమైంది. పాక్​ బలగాలు కాల్పుల విరమణ ఒప్పందాన్ని పదేపదే ఉల్లంఘిస్తూనే ఉన్నాయి.

సంయమనం పాటించాలి : అమెరికా

మైక్​ పాంపియో

భారత్​, పాక్​ విదేశాంగ మంత్రులతో విడివిడిగా మాట్లాడినట్టు తెలిపారు అమెరికా విదేశాంగ మంత్రి​ మైక్​ పాంపియో.

" సంయమనం పాటించాలని భారత్​, పాకిస్థాన్​ విదేశాంగ మంత్రులకు సూచించాం. ఉద్రిక్త పరిస్థితులు ఎట్టిపరిస్థితుల్లో తీవ్రం కాకుండా చూడాలని విజ్ఞప్తి చేశాం." -- మైక్​ పాంపియో, అమెరికా విదేశాంగ మంత్రి

సహకరిస్తాం : రష్యా

భారత్​, పాకిస్థాన్​ దేశాల సరిహద్దుల వద్ద పరిస్థితిపై ఆందోళన వ్యక్తం చేస్తున్నామని ప్రకటించింది రష్యా విదేశాంగ శాఖ.

"ఇరు దేశాలు సంయమనం పాటించాలని విజ్ఞప్తి చేస్తున్నాం. రాజకీయ, దౌత్యపరమైన చర్చలతో సమస్యల పరిష్కారానికి ప్రయత్నించాలి. ఉగ్రవాదంపై పోరుకు ఇరు దేశాలకు సహకరించేందుకు సిద్ధంగా ఉన్నాం. " -- రష్యా విదేశాంగ శాఖ

పరిశీలిస్తున్నాం : బ్రిటన్​

బ్రిటన్​ ప్రధాని థెరిసా మే

భారత్​, పాకిస్థాన్​ దేశాల మధ్య నెలకొన్న తీవ్ర ఉద్రిక్త పరిస్థితులపై ఆందోళన వ్యక్తం చేశారు బ్రిటన్​ ప్రధాని థెరీసా మే. ఇరు దేశాల పరిస్థితిని ఎప్పటికప్పడు పరిశీలిస్తూనే ఉన్నామని చెప్పారు.

" భారత్​, పాక్​ దేశాలు సంయమనం పాటించాలి. ఉద్రిక్తతలు తగ్గేలా చర్యలు తీసుకోవాలి. ఇరు దేశాలతో సంప్రదింపులు జరుపుతున్నాం. చర్చలతో దౌత్యపరంగా సమస్యలు పరిష్కరించుకోవాలి." -- థెరీసా మే, బ్రిటన్​ ప్రధాని

రాజకీయ, దౌత్య చర్చల ద్వారా ఉన్న సమస్యలు పరిష్కరించుకోవడం ఉత్తమ మార్గమని సూచించింది మాస్కో.

శాంతికి కృషి చేయాలి : చైనా

భారత్​, పాక్​ త్వరగా చర్చించుకొని సరిహద్దుల్లో శాంతిని నెలకొల్పేందుకు కృషి చేయాలని కోరింది చైనా. సంయమనం పాటిస్తూ ఉద్రిక్తతలను తగ్గించేందుకు పాటుపడాలని చెప్పింది.

ఉగ్రవాదాన్ని ఉపేక్షించకూడదు..

భారత్​, పాక్​ దేశాల మధ్య త్వరలోనే సమస్యలు సమసిపోతాయని ఆకాంక్షించింది ఐరోపా సమాఖ్య​. ఉగ్రవాదాన్ని ఏ దేశమైన ఉపేక్షించకూడదని అభిప్రాయపడింది. ఇరు దేశాలతో సంప్రదింపులు జరుపుతున్నామని తెలిపింది. సంయమనం పాటించాలని కోరింది.

దాడులు వద్దు

సార్క్‌ సభ్యదేశంగా భారత్‌, పాకిస్థాన్​లను శాంతియుతంగా ఉండాలని నేపాల్​ కోరింది. పరస్పర దాడులకు పాల్పడవద్దని సూచించింది.