జాదవ్​కు న్యాయం జరిగేనా?

భారత్​కు చెందిన మాజీ నౌకాదళ అధికారి కుల్​భూషణ్​ జాదవ్​ కేసు సోమవారం అంతర్జాతీయ న్యాయస్థానంలో విచారణకు రానుంది. గూఢచర్యం ఆరోపణలతో పాక్​ ఆయనను అదుపులోకి తీసుకొంది.

గూఢచర్యం ఆరోపణలపై పాక్​ అదుపులోకి తీసుకున్న భారత మాజీ నౌకాదళ అధికారి కుల్​భూషణ్​ సుధీర్​ జాదవ్​ కేసు సోమవారం అంతర్జాతీయ న్యాయస్థానంలో విచారణకు రానుంది. జాదవ్ మరణ శిక్షను నిలుపుదల చేసేలా పాక్​కు ఆదేశాలివ్వాలని ఐరాసను భారత్​ కోరనుంది.​ పుల్వామా ఘటన అనంతరం విచారణ జరుగుతోన్న ఈ కేసులో తీర్పు ఎలా ఉంటుంది, భారత్​ ఎలా ప్రతి స్పందిస్తుందన్న విషయంపై సర్వత్రా ఉత్కంఠ నెలకొంది.

గతంలో ఏం జరిగింది?

2016 లో గూడఛర్యం ఆరోపణలతో బలూచిస్థాన్​ ప్రాంతంలో పాక్​ జాదవ్​ను అదుపులోకి తీసుకొంది. కేసును విచారించిన పాక్​ సైనిక కోర్టు జాదవ్​కు ఉరిశిక్ష విధించింది.

దీనిని వ్యతిరేకిస్తూ భారత్​, అంతర్జాతీయ న్యాయస్థానాన్ని ఆశ్రయించింది. 2017లో తదుపరి ఆదేశాలు జారీ చేసేవరకు జాదవ్​ ఉరిని ఆపాలంటూ పాక్​కు ఐసీజే అత్యవసర ఆదేశాలు జారీ చేసింది. రేపటి నుంచి ఈ కేసులో వాదనలు ప్రారంభం కానున్నాయి. సోమవారం భారత్​, మంగళవారం పాక్​ వాదనలు వినిపించనున్నాయి. భారత్​ తరఫున దిల్లీకి చెందిన న్యాయవాదులు వాదనలు వినిపించనున్నారు.

పాక్​ ఎందుకు అరెస్ట్​ చేసింది?

జాదవ్​ భారత నిఘా సంస్థకు చెందిన వారని, అఫ్ఘానిస్థాన్​ సరిహద్దులో విధులు నిర్వహిస్తున్నారని ఇస్లామాబాద్​ ఆరోపిస్తోంది. జాదవ్​ను పాక్​​ అపహరించి అక్రమంగా కేసు బనాయించిందని భారత్​ వాదిస్తోంది.

'వియన్నా' ఒప్పందాన్ని ఇస్లామాబాద్​ అతిక్రమించిందని ,జాదవ్​ను​ చిత్రహింసలకు గురిచేస్తోందని భారత్​ పేర్కొంది. కుల్​ భూషణ్​ కుటుంబం కలవడానికి వెళ్లినప్పుడూ పాక్​ అధికారులు అమానుషంగా ప్రవర్తించారని భారత్ మండిపడింది.