వేర్పాటువాదులపై వేటు

పుల్వామా ఘటన నేపథ్యంలో జమ్ముకశ్మీర్​లోని వేర్పాటువాదులకు భద్రతను ఉపసంహరిస్తూ ప్రభుత్వం నిర్ణయం తీసుకుంది.

జమ్ముకశ్మీర్​లోని ఆరుగురు వేర్పాటువాదులకు భద్రతను ఉపసంహరిస్తూ ఆ రాష్ట్ర ప్రభుత్వం ఆదేశాలు జారీచేసింది. వేర్పాటువాదులైన హురియత్​ కాన్ఫరెన్స్​ అధినేత మిర్వైజ్​ ఉమర్ ఫరూఖ్​, అబ్దుల్​ ఘనీ భట్​, బిలాల్​ లోనే, హషీం ఖురేషీ, షబ్బీర్ షాలకు భద్రత తొలగించారు. అయితే ఈ జాబితాలో పాక్​ అనుకూలవాది సయ్యద్​ అలీషా పేరు లేకపోవడం గమనార్హం.

ఆరుగురు వేర్పాటువాదులకు ఇప్పటి వరకు కల్పించిన వాహనాలు, భద్రతా సిబ్బంది, ఇతర సౌకర్యాలు ఉపసంహరిస్తున్నారు. ఇకపై ఈ ఆరుగురితోపాటు, ఇతర వేర్పాటువాదులకు ఏ కారణంతోనూ ఎలాంటి భద్రత కల్పించరు.

పుల్వామా ఉగ్రదాడి నేపథ్యంలో కేంద్ర హోంమంత్రి రాజ్​నాథ్​ సింగ్​ శుక్రవారం జమ్ముకశ్మీర్​లో పర్యటించారు. పాకిస్థాన్​ ప్రేరేపిత వేర్పాటువాదులపై నిఘా ఉంచాలని పోలీసులను ఆదేశించారు. పాక్​ ప్రభుత్వం, ఐఎస్​ఐ ద్వారా నిధులు పొందుతూ దేశద్రోహానికి పాల్పడుతున్న వారిని గుర్తించాలన్నారు.