దేశం కోసం ధైర్యసాహసాలతో పోరాడుతున్న కుమారుడ్ని చూసి చాలా గర్వపడుతున్నట్లు పాక్ చెరలో చిక్కుకున్న భారత్ పైలెట్ తండ్రి పేర్కొన్నారు. తన కుమారుడు సురక్షితంగా తిరిగి భారత్కు చేరుకుంటారని ఆశాభావం వ్యక్తం చేశారు. ఈ కష్ట సమయంలో మద్దతుగా నిలిచిన దేశ ప్రజలకు ధన్యవాదాలు తెలిపారు.
సామాజిక మాధ్యమాల్లో వైరల్ అవుతున్న 'భారత పైలట్' వీడియోపై స్పందించిన ఈ రిటైర్డ్ ఎయిర్ మార్షల్, తన కుమారుడు నిజమైన సైనికుడిలా మాట్లాడాడని పేర్కొన్నారు.
"మాకు మద్దతుగా నిలిచిన స్నేహితులకు ధన్యవాదాలు. ఆ దేవుడు చల్లని ఆశీస్సులు అందించాడు. తను బతికే ఉన్నాడు. ఎలాంటి గాయాలు కాలేదు. నిలకడగానే ఉన్నాడు. అతను నిజమైన సైనికుడిలా ధైర్యంగా మాట్లాడాడు. తనను చూసి మేము గర్వపడుతున్నాము." _ పాక్ చెరలోని భారత్ పైలట్ తండ్రి, రిటైర్డ్ ఎయిర్ మార్షల్
సురక్షితంగా విడుదలవుతారు
పాక్ చెరలో చిక్కుకున్న భారత పైలట్ సురక్షితంగా స్వదేశానికి చేరుకుంటారని, గతంలో పాకిస్థాన్లో భారత రాయబారిగా పనిచేసిన జి. పార్థసారథి తెలిపారు. కార్గిల్ యుద్ధంలో పాక్ బందీగా చిక్కిన భారత వైమానిక దళ పైలట్ కె.నచికేతను సురక్షితంగా విడిపించడంలో పార్థసారథి ప్రముఖ పాత్ర వహించారు.
"తను (భారత పైలెట్) సురక్షితంగా భారత్కు చేరుకుంటారని నమ్ముతున్నాను. ఈ విషయంలో నాకు ఎలాంటి అనుమానం లేదు. పాక్ జెనీవా ఒప్పందం(1929)పై సంతకం చేసింది. కనుక దానిని ఉల్లంఘించలేదు."
-జి.పార్థసారథి, పాక్లో భారత మాజీ రాయబారి
ఇదీ జరిగింది
పుల్వామా దాడికి ప్రతీకారంగా భారత్ జైష్ ఏ మహమ్మద్ స్థావరాలపై దాడి చేసింది. దీనికి ప్రతిగా పాక్ భారత భూభాగంపై వైమానిక దాడులకు యత్నించింది. ఈ దాడులను సమర్థంగా భారత్ తిప్పికొట్టి పాక్ యుద్ధవిమానాన్ని నేలకూల్చింది. ఇదే సమయంలో భారత్ తన మిగ్ యుద్ధ విమానాన్ని కోల్పోయింది. అందులోని భారత పైలట్ను పాక్ బందీగా పట్టుకుంది.
