ఐసీఐసీఐ మాజీ సీఈఓ చందా కొచ్చర్, ఆమె భర్త దీపక్లకు సీబీఐ, ఎన్ఫోర్స్మెంట్ డైరెక్టరేట్లు సమన్లు జారీ చేసే అవకాశమున్నట్లు ఆయా శాఖల్లో పనిచేస్తున్న అధికారులు వెల్లడించారు. రూ. 3250 కోట్ల విలువైన పరపతి కేసులో పారిశ్రామిక వేత్త వీ.ఎన్. దూత్తో పాటు దీపక్కూ పాత్ర ఉందని సీబీఐ అధికారులు తెలిపారు.
జనవరి 24నాటి దాడుల్లో లభ్యమైన పత్రాల ఆధారంగా సమన్లు జారీ చేసేందుకు నిర్ణయం తీసుకున్నట్లు తెలిపారు. దర్యాప్తులో భాగంగా దీపక్ కొచ్చర్, వీ.ఎన్.దూత్లను హాజరయ్యేందుకు పిలవనున్నట్లు సమాచారం.
చందా కొచ్చర్పై లుక్ అవుట్ నోటీసులు జారీ చేసింది సీబీఐ. గత మార్చిలో దీపక్, వీ.ఎన్. దూత్లకు వ్యతిరేకంగా లుక్ అవుట్ నోటీసులు జారీ చేసింది. సీబీఐ ఎఫ్ఐఆర్ మేరకు ఎన్ఫోర్స్మెంట్ డైరెక్టరేట్ మనీ ల్యాండరింగ్ కేసు దాఖలు చేసింది.
నీకిది-నాకది తరహాలో జరిగిన వ్యవహారంలో దీపక్ కొచ్చర్కు చెందిన న్యూపవర్ రిన్యూయబుల్స్లో రూ. 64 కోట్ల పెట్టుబడి పెట్టినట్లు సమాచారం. ఇరు వర్గాల మధ్య లావాదేవీలను పరిశీలిస్తున్నట్లు ఈడీ అధికారి ఒకరు తెలిపారు. సందేహాల నివృత్తి కోసం ఎవరినైనా విచారణకు పిలుస్తామని పేర్కొన్నారు.
కొచ్చర్, వీ.ఎన్. దూత్లకు చెందిన భారత, విదేశాల్లోని ఆస్తుల లెక్కల్ని సైతం బయటికి తీస్తున్నట్లు అధికార వర్గాల సమాచారం.
