పంజాబ్ నేషనల్ బ్యాంక్ కుంభకోణం నిందితుడు, వజ్రాల వ్యాపారి నీరవ్మోదీకి చెందిన 177.72 కోట్ల విలువైన ఆస్తులను ఎన్ఫోర్స్మెంట్ డైరెక్టరేట్ (ఈడీ) జప్తు చేసింది. 'అక్రమ నగదు చెలామణి' చట్టం ప్రకారం ఈడీ నీరవ్ ఆస్తులను జప్తు చేసింది.
ప్రస్తుతం ముంబయి, గుజరాత్లోని సూరత్లో ఉన్న నీరవ్ మోదీకి చెందిన రూ.147 కోట్ల 72 లక్షల 86 వేల 651 విలువైన స్థిర, చరాస్తులను ఈడీ స్వాధీనం చేసుకుంది. వీటిలో నీరవ్కి చెందిన భవనాలు, కర్మాగారం, అందులోని యంత్ర సామగ్రి, 8 కార్లు, నగలు, పెయింటింగ్స్ ఉన్నాయని అధికారులు తెలిపారు.
గతంలో స్వాధీనం చేసుకున్నవి
ఇంతకుముందు నీరవ్కు చెందిన దేశ విదేశాల్లోని సుమారు రూ.7,725.36 కోట్ల విలువైన ఆస్తులను ఈడీ జప్తు చేసింది. అలాగే రూ.489.75 కోట్ల విలువైన బంగారం, వజ్రాలు, బులియన్, నగలు, విలువైన వస్తువులు స్వాధీనం చేసుకుంది.
ఇదీ అసలు కథ
నీరవ్మోదీ పంజాబ్ నేషనల్ బ్యాంక్ కుంభకోణంలో సుమారు 13 వేల కోట్ల రూపాయల మేర మోసానికి పాల్పడినట్లు ఆరోపణలు ఎదుర్కొంటున్నారు. పంజాబ్ నేషనల్ బ్యాంకు నుంచి నీరవ్మోదీ సంస్థలైన సోలార్ ఎక్స్పోర్ట్స్, స్టెల్లార్ డైమెండ్స్ ఆర్యూఎస్లు రుణాలు పొందాయి. వీటిని అక్రమ మార్గాల్లో నీరవ్మోదీ, అతని బంధువులు, సన్నిహితుల ఖాతాల్లోకి మళ్లించారు. ఫలితంగా పంజాబ్ నేషనల్ బ్యాంక్ నష్టాల్లో కూరుకుపోయింది.
నీరవ్ మోదీ ఆధ్వర్యంలో ఫైర్స్టార్ డైమెంట్ ఇంటర్నేషనల్ ప్రైవేట్ లిమిటెడ్, ఫైర్స్టార్ ఇంటర్నేషనల్ ప్రైవేట్ లిమిటెడ్, రాధేషీర్ జ్యువెలరీ కంపెనీ ప్రైవేట్ లిమిటెడ్, రిథమ్ హౌస్ ప్రైవేట్ లిమిటెడ్ల సంస్థలు ఉన్నాయి.
ఈ కుంభకోణంపై మొదటిగా కేంద్ర దర్యాప్తు సంస్థ (సీబీఐ) ఎఫ్ఐఆర్ నమోదుచేసింది. దీని ఆధారంగా నీరవ్ మోదీపై, అతనికి సహకరించిన బ్యాంకు అధికారులు, సహనిందితులపై ఈడీ అక్రమ నగదు చెలామణి కేసును 2018 ఫిబ్రవరి 15న నమోదు చేసింది.
