12 రోజుల క్రితం పుల్వామా ఉగ్రదాడిలో 40 మంది సీఆర్పీఎఫ్ జవాన్లు ప్రాణాలు కోల్పోయారు. సైనికులపై ఉగ్రచర్య నీచమైనదిగా దేశమంతా ఖండించింది. ఇందుకు ప్రభుత్వం ప్రతీకారం తీర్చుకుంటామని గట్టి సంకేతాలు పంపింది. దాడి జరిగిన మరుక్షణం నుంచి ఉగ్రవాదులకు బుద్ధి చెబుతామని ప్రధాని మోదీ, కేంద్ర హోంమంత్రి రాజ్నాథ్ సింగ్, రక్షణ మంత్రి నిర్మలా సీతారామన్ స్పష్టం చేశారు.
పలు దఫాలుగా త్రివిధ దళాధిపతులు సమావేశమై ఉగ్రవాదులపై ప్రతీకారానికి పక్కా ప్రణాళికలు రచించారు. జమ్మూకశ్మీర్ నియంత్రణ రేఖ వద్ద వైమానిక దాడి చేసేందుకు నిర్ణయించుకున్నారు. అందుకనుగుణంగానే ఎయిర్ ఫోర్స్ యుద్ధ విమానాలు జమ్మూకశ్మీర్ను తమ అధీనంలోకి తీసుకున్నాయి. గత కొద్దిరోజులుగా ఉగ్రమూకల స్థావరాలను గమనిస్తున్నాయి.
రక్షణమంత్రి నేతృత్వంలో సోమవారం మరోసారి సమావేశమైన త్రివిధ దళాలు మంగళవారం ఉదయమే జమ్మూకశ్మీర్లోని బాలాకోట్, ఛకోటీ, ముజఫరాబాద్లోని ఉగ్రమూకల స్థావరాలను నేలమట్టం చేశాయి.
⦁ పుల్వామా ఉగ్రదాడి అనంతరం ఉగ్రవాదులకు గట్టి సమాధానమిస్తామని ప్రధాని నరేంద్రమోదీ హెచ్చరికలు
⦁ కేంద్ర హోంమంత్రి, రక్షణ మంత్రితో పలు దఫాలుగా ప్రధాని సమావేశం
⦁ ఉగ్రదాడికి ప్రతీకారంపై త్రివిధ దళాలకు ప్రభుత్వం దిశానిర్దేశం
⦁ త్రివిధ దళాధిపతులతో కేంద్ర రక్షణ మంత్రి దిల్లీలో సోమవారం సమావేశం
⦁ వైమానిక దాడుల ప్రణాళికను ప్రధానికి వివరించిన జాతీయ భద్రతా సంస్థ(ఎన్ఎస్ఏ)
⦁ మంగళవారం తెల్లవారు జామున 3 గంటల 30 నిమిషాలకు ఉగ్రవాద శిబిరాలే లక్ష్యంగా వైమానిక దాడులు
