నిఘా నీడలో జమ్ము

పుల్వామా ఉగ్రదాడి తర్వాత జమ్ముకశ్మీర్​లో ఎలాంటి అవాంఛనీయ ఘటనలు చోటు చేసుకోకుండా విధించిన కర్ఫ్యూ మూడో రోజూ కొనసాగింది. సాధారణ పరిస్థితుల పునరుద్ధరణకు అధికారులు ప్రయత్నిస్తున్నారు.

పుల్వామా ఉగ్రదాడితో జమ్ము నగరంలో విధించిన కర్ఫ్యూ నిరంతరాయంగా కొనసాగుతోంది. సమస్యాత్మక ప్రాంతాల్లో సైనికులు ఫ్లాగ్​ మార్చ్​ నిర్వహించారు. ముందు జాగ్రత్తగా అనేక మందిని అదుపులోకి తీసుకున్నారు. గుజ్జర్​ నగర్​, జానిపూర్​, షహీది చౌక్​, తలాబ్​ ఖటిక, సిధ్రా వంటి సున్నితమైన ప్రదేశాల్లో అంతర్గత భద్రత, వైట్​ నైట్​ బలగాల మోహరింపు కొనసాగుతుందని అధికారులు చెప్పారు.

"జమ్ము నగరంలో కర్ఫ్యూ కొనసాగుతోంది. ఇప్పటి వరకు ఎలాంటి అవాంఛనీయ ఘటనలు జరగలేదు. శనివారం కొన్ని ప్రాంతాల్లో రాళ్ల దాడులు జరిగినప్పటికీ పరిస్థితులు అదుపులోనే ఉన్నాయి."- ఎంకే సిన్హా, ఐజీ, జమ్ము.

సామాన్యులపై బంద్​ ప్రభావం

కశ్మీరీలపై దాడులు, వేధింపులకు పాల్పడుతున్నారనే కారణంతో కశ్మీర్​వ్యాప్తంగా బంద్​కు పిలుపునిచ్చాయి వాణిజ్య సంస్థలు. శ్రీనగర్​లో దుకాణాలు, పెట్రోల్​ బంకులు​, ఇతర వ్యాపార సముదాయాలు మూతపడ్డాయి. ప్రజారవాణా, ఆటోలు, క్యాబ్​లు రోడ్లపైకి రావటం లేదు.