రైతులకు ప్రత్యక్ష నగదు బదిలీ ద్వారా ఆర్థిక సాయం అందించే ప్రధాన మంత్రి కిసాన్ సమ్మాన్ నిధి పథకాన్ని ప్రధాని నరేంద్రమోదీ ఉత్తర్ప్రదేశ్ గోరఖ్పూర్లో లాంఛనంగా ప్రారంభించారు. తొలివిడతగా కోటీ లక్ష మంది రైతుల ఖాతాల్లోకి రూ.2వేలు బదిలీ చేశారు.
రెండు హెక్టార్ల లోపు భూమి ఉన్న రైతులకు ఆర్థిక సాయంగా ఏడాదికి 6 వేల రూపాయలు అందిస్తామని ఇటీవలే బడ్జెట్లో ప్రకటించింది కేంద్రం.
కిసాన్ సమ్మాన్ నిధి పథకాన్ని అన్ని రాష్ట్రాల ప్రభుత్వాలు అమలు చేయాలని మోదీ స్పష్టం చేశారు. కొన్ని రాష్ట్రాలు రైతులకు లబ్ధి చేకూరకుండా దుష్ట రాజకీయలు చేస్తున్నాయని ఆరోపించారు. అలాంటి పార్టీలకు వచ్చే ఎన్నికల్లో రైతులే తగిన బుద్ధి చెబుతారని ప్రధాని అన్నారు.
కాంగ్రెస్పై విమర్శలు
కాంగ్రెస్ పార్టీకి పదేళ్లకోసారి ఎన్నికలకు ముందు మాత్రమే రైతులు గుర్తుకువస్తారని విమర్శించారు ప్రధాని. రుణమాఫీ చేస్తామని అబద్దాలు చెప్పి ఓట్లు రాబట్టుకోవడం వారికి అలవాటుగా మారిందని ఆరోపించారు. రైతు సేవ అంటే ఏంటో తమ ప్రభుత్వం చేసి చూపిస్తుందని మోదీ తెలిపారు. అందుకే బడ్జెట్లో నిధులు కేటాయించామని గుర్తు చేశారు. ప్రతి ఏటా ఆరువేల రూపాయలు రైతుల ఖాతాల్లోకి నేరుగా జమ చేస్తామని స్పష్టం చేశారు.
2022నాటికి దేశంలోని ప్రతి రైతు ఆదాయం రెట్టింపు చేసేందుకు ప్రభుత్వం కృషి చేస్తోందని తెలిపారు మోదీ.
ప్రయాగ్రాజ్లో ప్రత్యేక పూజలు
గోరఖ్పుర్ నుంచి నేరుగా ప్రయాగ్రాజ్ కుంభామేళాకు చేరుకున్నారు ప్రధాని. త్రివేణీ సంగమంలో పవిత్ర స్నానం ఆచరించారు. అనంతరం గంగా మాతకు ప్రత్యేక పూజలు నిర్వహించారు.
కార్మికుల కాళ్లు కడిగిన మోదీ
ప్రయాగ్రాజ్లో అరుదైన సన్నివేశం ఆవిష్కృతమైంది. పారిశుద్ధ్య కార్మికుల కాళ్లు కడిగారు ప్రధాని. స్వయంగా కండువాతో శుభ్రపరిచారు. స్వచ్ఛ భారత్ నిర్మాణంలో పారిశుద్ధ్య కార్మికుల కృషికి గుర్తింపుగా ఇలా చేశారు.
అనంతరం అక్కడ ఏర్పాటు చేసిన సభలో ప్రసంగించారు.
ప్రయాగ్ రాజ్ కుంభమేళాలో పరిసర ప్రాంతాలను శుభ్రంగా ఉంచడంలో బాధ్యతాయుతంగా వ్యవహరించిన పారిశుద్ధ్య కార్మికులను ప్రశంసించారు ప్రధాని. స్వచ్ఛతలో దేశానికే ఆదర్శంగా నిలిచారని కితాబిచ్చారు.
"రైతులకు నేరుగా లబ్ధి చేకూర్చేందుకే పీఎం కిసాన్ సమ్మాన్ నిధి. ఈరోజు ఉత్తర ప్రదేశ్ పవిత్ర నేల నుంచి దేశంలోని కోట్లాది మంది రైతులకు దీనిని అంకితం చేస్తున్నా. కొద్దిసేపటి క్రితమే 1.01కోట్ల మంది రైతుల బ్యాంకు ఖాతాల్లో మొదటి విడత నగదు జమ చేసే అదృష్టం నాకు దక్కింది. మిగతా రైతులకు కూడా మొదటి విడతగా రూ.2వేలు త్వరలోనే జమచేస్తాం. ఇది ఆరంభం మాత్రమే. ప్రతి ఏటా కేంద్ర ప్రభుత్వం తరఫున ఆరువేల రూపాయలను మీ ఖాతాల్లో జమచేస్తాం. ఈ కాంగ్రెస్ వాళ్లకు పదేళ్లలకు ఒక్కసారి మాత్రమే రైతులు గుర్తుకువస్తారు. అదికూడా ఎన్నికలకు ముందే..రుణమాఫీ చేస్తామని మాయమాటలు చెబుతారు. రుణమాఫీ ఆశచూపి రైతుల కళ్లుగప్పి ఓట్లు రాబట్టుకోవడం నేర్చుకున్నారు. వాళ్లకు తెలియదు మోదీ వస్తారని. అబద్ద ప్రచారాలను అడ్డుకుంటారని.. రైతు సేవ అంటే ఏంటో మోదీ ప్రభుత్వం చేసి చూపిస్తుంది."
-నరేంద్ర మోదీ, ప్రధాన మంత్రి
