పుల్వామా దాడి తర్వాత భారత్ తీవ్రంగా ప్రతిస్పందిస్తుందన్నది అందరూ ఊహించిందే. అందుకు తగినట్లే ఉగ్రవాదులూ ముందుజాగ్రత్త చర్యలు చేపట్టారు. నియంత్రణ రేఖకు సమీపంలో... పాక్ ఆక్రమిత కశ్మీర్లో ఉన్న శిబిరాల్ని ఖాళీ చేయించింది జైషే మహ్మద్. దాదాపు 325మంది ఉగ్రవాదులు, 25 నుంచి 27మంది శిక్షకులను బాలాకోట్ అడవిలో ఉన్న స్థావరానికి తరలించింది.
పాకిస్థాన్ అబోటాబాద్లోని నియంత్రణ రేఖకు 80కిలోమీటర్ల దూరంలో ఉంది బాలాకోట్. గతంలో అమెరికా దళాలు ఒసామా బిన్ లాడెన్ను హతమార్చింది అబోటాబాద్లోనే.
జైషే మహ్మద్ నేతల ధైర్యం ఒకటే. భారత దళాలు మెరుపుదాడి చేసినా... బాలాకోట్ వరకు రావని. మహా అయితే నియంత్రణ రేఖకు సమీపంలో, పాక్ ఆక్రమిత కశ్మీర్లోని స్థావరాలపై దాడి చేస్తారని భావించారు జైషే నేతలు.
పక్కా సమాచారం
ఉగ్రవాదులను బాలాకోట్ స్థావరానికి తరలించినట్లు భారత బలగాలు ముందే పసిగట్టాయి. కచ్చితమైన నిఘా సమాచారంతో ఆపరేషన్కు ప్రణాళికలు రచించాయి.
వేకువజామున 3.30గంటలు. బాలాకోట్ స్థావరంలో ప్రతి ఒక్కరూ నిద్రలో ఉన్నారు. భారత బలగాలు నియంత్రణ రేఖ దాటి అంత లోపలకు వస్తుందని పాకిస్థాన్ దళాలు ఊహించలేదు. ఫలితంగా భారత వాయుసేన పని నల్లేరుపై నడక అయింది. 6 బాంబుల్ని జారవిడిచాయి మిరాజ్ విమానాలు. వందల మంది ముష్కరుల ప్రాణాలు క్షణాల్లో గాల్లో కలిశాయి.
పాక్ను తికమకపెట్టి..
వివిధ వైమానిక స్థావరాల నుంచి బయల్దేరిన 'మిరాజ్' విమానాలు పాకిస్థాన్ను తికమకపెట్టాయి. వారు ఎక్కడికి వెళుతున్నారో, ఏం చేస్తున్నారో అర్థం కాని పరిస్థితి సృష్టించింది వాయుసేన. అందులోని ఓ చిన్న వైమానిక బృందం బాలాకోట్ వైపు పయనించింది. అక్కడే మంచి నిద్రలో ఉన్న ఉగ్రవాదులపై బాంబులతో విరుచుకుపడింది భారత వాయుసేన. వెయ్యి కిలోల పేలుడు పదార్థాలతో స్థావరాన్ని నామరూపాల్లేకుండా చేసింది.
విలాసాల అడ్డా...
ఖైబర్ పఖ్తుంఖ్వ రాష్ట్రం కున్హర్ నదీ తీరంలో బాలాకోట్ ఉంది. ఇక్కడ నుంచి 20 కిలోమీటర్ల దూరంలో కొండపై జైషే స్థావరం ఉంది. ఇది ఓ ఐదు నక్షత్రాల రిసార్టును తలపిస్తుందంటారు. ఈత కొలను, వంట మనుషులు, సేవకులు.. ఇలా అన్ని సౌకర్యాలు ఉంటాయి ఇక్కడ. 500 నుంచి 700మందికి ఆశ్రయం కల్పించే వీలుంది.
ఇదే స్థావరాన్ని హిజ్బుల్ ముజాహిద్దీన్ సంస్థ కూడా ఉపయోగిస్తోంది. జైషేకు చెందిన అత్యంత ముఖ్యమైన శిక్షణ కేంద్రమూ ఇదే.
ఈ స్థావరంలో ఉగ్రవాదులకు శిక్షణ ఇచ్చేవారంతా పాక్ సైన్యం మాజీ అధికారులని ప్రభుత్వ వర్గాలు వెల్లడించాయి.
