వివాహానికి ముందే వీరమరణం

జమ్మూలో ఆర్మీ మేజర్​ బిస్త్​ మృతితో కుటుంబ సభ్యులు విషాదంలో మునిగిపోయారు. మార్చి 7న బిస్త్​కు వివాహం నిశ్చయించారు. వివాహానికి ముందే ఆయన వీరమరణం ఆ కుటుంబాన్ని శోకసంద్రంలోకి నెట్టేసింది.

మరికొద్ది రోజుల్లో పెళ్లి. కుటుంబ సభ్యులందరూ ఉత్సాహంగా ఏర్పాట్లు చేస్తున్నారు. ఈ లోపు ఓ మరణవార్త ఆ కుటుంబాన్ని కలచివేసింది. అప్పటి వరకు సందడిగా ఉన్న వారంతా శోకసంద్రంలో మునిగిపోయారు.

ఉత్తరాఖండ్​ డెహ్రాడూన్​కు చెందిన ఆర్మీ మేజర్​ చిత్రేష్​ బిస్త్​ జమ్మూలోని రాజౌరీ సెక్టార్​లో ఇంజనీరింగ్​ విభాగంలో విధులు నిర్వహిస్తున్నారు. శనివారం సాయంత్రం నౌషెరా సెక్టారులో రోజువారీ తనిఖీల్లో భాగంగా శక్తిమంతమైన ఐఈడీని గుర్తించాయి భద్రతా బలగాలు. సమాచారం అందుకున్న బిస్త్​ పేలుడు పదార్థాన్ని నిర్వీర్యం చేయడానికి ఆ ప్రాంతానికి చేరుకున్నారు. ఈ క్రమంలో అనుకోకుండా ఐఈడీ పేలింది. బిస్త్​ అక్కడిక్కడే ప్రాణాలు విడిచారు.

తండ్రీ పోలీసే:

చిత్రేష్​ బిస్త్​ తండ్రి ఎస్​ ఎస్​ బిస్త్​ పోలీసు శాఖలో విధులు నిర్వర్తించి, ఇటీవలే పదవీ విరమణ చేశారు.

అంతిమ వీడ్కోలు:

ఐఈడీ పేలుడులో అసువులు బాసిన బిస్త్​ పార్థివదేహం దేహ్రాదూన్​ చేరింది. సైనికులు గౌరవవందనం చేసి, నివాళులర్పించారు. అధికార లాంఛనాలతో అంతిమ యాత్రకు ఏర్పాట్లు చేశారు.