Protest against MLA: ఎమ్మెల్యే ఎమ్మెస్​ బాబుకు నిరసన సెగ.. గడప గడపలో వ్యతిరేకంగా ఫ్లెక్సీలు

Protest against MLA: పూతలపట్టు ఎమ్మెల్యే ఎమ్మెస్ బాబుకి వరుసగా నిరసన సెగలు తగులుతున్నాయి. పూతలపట్టు నియోజకవర్గం తవణంపల్లి మండలం తెల్లగుండ్లపల్లిలో ఎమ్మెస్ బాబు గడప గడపకు మన ప్రభుత్వం కార్యక్రమం నిర్వహించారు. ఈ  నేపథ్యంలో గ్రామస్థులు, టీడీపీ నాయకులు ఎమ్మెల్యేకి వ్యతిరేకంగా ఫ్లెక్సీలు ఏర్పాటు చేశారు. ఎమ్మెల్యే తీరుపై నిరసన వ్యక్తం చేశారు. ఈ నాలుగు సంవత్సరాలలో ఊరికి ఏం చేశారో చెప్పాలంటూ నిలదీశారు. తమ గ్రామానికి ఎందుకు వస్తున్నావ్ అంటూ ఫ్లెక్సీలు ఏర్పాటు చేశారు. ఫ్లెక్సీ రూపంలో,  టీడీపీ జెండాలతో ప్రశ్నించేందుకు సిద్ధంగా  ఉన గ్రామస్థులను గుర్తించిన  పోలీసులు.. గ్రామానికి చేరుకుని ఫ్లెక్సీలను తొలగించారు. ఈ విషయం తెలుసుకున్న ఎమ్మెల్యే బాబు తెల్లగుండ్లపల్లి గ్రామం మొదట్లో జండా ఆవిష్కరించి అక్కడి నుంచి వెనుతిరిగి వెళ్లిపోయారు. అదే గ్రామంలో ఎస్సీ కాలనీలో గడప గడప కార్యక్రమం నిర్వహించారు. ఈ సందర్భంగా మాట్లాడిన గ్రామస్థులు ఎమ్మెల్యే గెలిచిన తరువాత తమ గ్రామంలో సమస్యలపై సరిగా స్పందించలేదనీ.. అనేక సార్లు ఎమ్మెల్యేతో మెుర పెట్టుకున్నా  సమస్యలు పరిష్కారం కాలేదని ఆగ్రహం వ్యక్తం చేశారు.