ICC World cup 2023 Hotstar : క్రికెట్ ఫ్యాన్స్‌కు ప్రముఖ ఓటీటీ సంస్థ డిస్నీ+ హాట్‌స్టార్‌ ఓ తియ్యటి కబురును అందించింది. త్వరలో జరగనున్న ఆసియా కప్, ఐసీసీ పురుషుల ప్రపంచ కప్ మ్యాచ్‌లను తమ ఓటీటీ వేదికపై ఉచితంగా వీక్షించవచ్చని ప్రకటించింది. అయితే, మొబైల్ వీక్షకులకు మాత్రమే ఈ ఆఫర్‌ను అందిస్తున్నట్లు ప్రకటనలో పేర్కొంది.
క్రికెట్ వినోదాన్ని వీలైనంత ఎక్కువ మందికి చేరువ చేయాలనే ఉద్దేశంతోనే ఈ నిర్ణయాన్ని తీసుకున్నట్లు డిస్నీ+ హాట్‌స్టార్‌ వెల్లడించింది. దీని ద్వారా భారత్‌లో 540 మిలియన్లకు పైగా ఉన్న మొబైల్ యూజర్లకు రాబోయే ప్రతిష్ఠాత్మక క్రికెట్ టోర్నమెంట్లను ఉచితంగా వీక్షించే అవకాశం లభిస్తుందని పేర్కొంది. అయితే ట్యాబ్లెట్లలో మ్యాచ్‌లను చూసే వారికి కూడా ఈ ఉచిత ఆఫర్‌ వర్తించనుందని తెలిపింది.
Asia cup 2023 Hotstar : ఆసియా కప్ 2023 సెప్టెంబరులో జరగనుంది. అలాగే పురుషుల ప్రపంచ కప్ అక్టోబరు 5న ప్రారంభమై.. నవంబరు 19వరకు కొనసాగనుంది. ఈ క్రమంలో ఈ రెండు ప్రతిష్ఠాత్మక టోర్నీలకు భారత్ ఆతిథ్యమివ్వనుంది. కాగా.. ఆసియా కప్‌లో భాగంగా మొత్తం 13 మ్యాచ్లు జరగనున్నాయి. దాదాపు 10 దేశాలు తలపడనున్న వరల్డ్ కప్‌లో మొత్తం 48 మ్యాచ్లు జరుగుతాయి. క్రికెట్‌ను విపరీతంగా అభిమానించే భారత్‌లో ఈ రెండు టోర్నీలకూ విశేష ఆదరణ ఉంటుంది.
Jio Ipl Viewership : ఇటీవలే ముగిసిన ఐపీఎల్‌ సీజన్కు రికార్డు స్థాయిలో వ్యూయర్‌షిప్‌ నమోదైన విషయం తెలిసిందే. అటు టీవీతో పాటు ఇటు డిజిటల్‌ ప్లాట్‌ఫామ్‌లోనూ కోట్లాది మంది మ్యాచ్‌లను వీక్షించారు. అయితే, బీసీసీఐ ఐపీఎల్‌ మీడియా రైట్స్‌ను తొలిసారి విభజించింది. డిస్నీ+ హాట్‌స్టార్‌ టీవీ ప్రసార హక్కులను, బిలియనీర్‌ ముకేశ్‌ అంబానీ నేతృత్వంలోని జియో సినిమా డిజిటల్‌ ప్రసార హక్కులను దక్కించుకుంది. అలా జియో సినిమా ఉచితంగానే మ్యాచ్‌లను ప్రసారం చేసింది.
మరోవైపు, క్రికెట్ ప్రేమికులకు ఇటీవలే జియో సినిమా (రిలయన్స్‌ జియో ఇన్ఫోకామ్‌) శుభవార్త చెప్పింది. ప్రపంచ టెస్ట్ ఛాంపియన్ షిప్ తర్వాత జరగనున్న భారత్-వెస్టిండీస్ సిరీస్‌ను జియో సినిమాలో ఉచితంగా వీక్షించవచ్చని ప్రకటించింది. జులై 12- ఆగస్ట్‌ 13 వరకు జరిగే ఈ సిరీస్‌లో అన్ని మ్యాచ్‌లకు ఇది వర్తిస్తుందని రిలయన్స్‌ జియో ఇన్ఫోకామ్‌ అధినేత ఆకాశ్‌ అంబానీ వెల్లడించారు.
India West Indies Tour 2023 : అయితే రెండు టెస్ట్లు, మూడు వన్డేలు, ఐదు టీ20లు ఆడేందుకు.. జులై 12 నుంచి వెస్టిండీస్లో పర్యటించనుంది. ఈ పర్యటనలో భారత్ తొలుత టెస్ట్లు, ఆ తర్వాత వన్డేలు, టీ20లు ఆడనుంది.
