Police Arrest to Drug Peddlers Gang : పాతబస్తీలోని బహదూర్‌పురాలో మాదకద్రవ్యాలు విక్రయిస్తున్న అయిదుగురు సభ్యుల ముఠాను యాంటి నార్కోటిక్‌ బ్యూరో పోలీసులు అరెస్టు చేశారు. అంబర్‌పేట్‌కు చెందిన సయ్యద్ ఫైసల్, నదియ, జునైద్‌ ఖాన్‌, మహ్మద్‌ అర్భరుద్దీన్‌, రహ్మత్‌ఖాన్‌లు కలిసి ముఠాగా ఏర్పడి డ్రగ్స్ విక్రయిస్తున్నట్టు పోలీసులు గుర్తించారు. బెంగళూరులో తక్కువ ధరకు ఎండీఎంఏ కొనుగోలు చేసి హైదరాబాద్ తీసుకువచ్చి అధిక ధరకు విక్రయిస్తున్నట్టు సమాచారం అందుకున్న పోలీసులు, ముఠాపై నిఘా ఏర్పాటు చేసి పట్టుకున్నారు.
వీరివద్ద నుంచి రూ.4 లక్షల విలువైన ఎండీఎంఏ స్వాధీనం చేసుకున్నారు. ఈ మేరకు నిందితులందరినీ అరెస్టు చేసి కోర్టులో హాజరుపరిచి, రిమాండ్‌కు తరలించారు. మరోవైపు ఈ ముఠా నుంచి డ్రగ్స్ కొనుగోలు చేసిన 19 మందిని పోలీసులు గుర్తించారు. వారిపైన కూడా చర్యలు చేపట్టనున్నారు. కాగా ప్రధాన నిందితుడు సయ్యద్ ఫైసల్పై గతంలో కూడా మాదకద్రవ్యాల విక్రయం కేసులున్నాయి.
