Google Personal Data Removal : గూగుల్ సెర్చ్ రిజల్ట్స్లో ఒక్కోసారి మన వ్యక్తిగత సమాచారం కనిపిస్తుంటుంది. ఇంటి చిరునామా, ఫోన్ నంబర్, ఈమెయిల్ ఐడీ వంటివి సెర్చ్ రిజల్ట్స్లో వస్తుంటాయి. వీటిని తొలగించాలంటే గూగుల్కు రిపోర్ట్ సమర్పించాల్సి ఉంటుంది. ఇది చాలా పెద్ద ప్రక్రియ. అయితే ఈ సమస్యను అధిగమించేందుకు కొన్నేళ్ల క్రితం కొత్త టూల్ను గూగుల్ అందుబాటులోకి తెచ్చింది. అయితే ఆ టూల్ను ఉపయోగించడం అంత సులభంగా లేదు. దాని కోసం సెట్టింగ్స్లోని మెనూలన్నీ వెతకాల్సి వచ్చేది. ఈ నేపథ్యంలో ఆ ప్రక్రియ మరింత సులభతరం చేసింది గూగుల్. ఇప్పుడు యూజర్లు డైరెక్ట్గా గూగుల్ సెర్చ్ నుంచే రిమూవల్ రిక్వెస్ట్ పెట్టొచ్చు. అదెలాగో ఇప్పుడు తెలుసుకుందాం.
గూగుల్ సెర్చ్ నుంచి వ్యక్తిగత సమాచారం తొలగించడం ఎలా?
- మీ వ్యక్తిగత సమాచారం గూగుల్ సెర్చ్ రిజల్ట్స్లో వచ్చినప్పుడు, దాని పక్కనే ఉన్న మూడు చుక్కలపై క్లిక్ చేయండి
- అనంతరం ఒక మెనూ ఓపెన్ అవుతుంది. అందులో "Remove Result" అనే బటన్పై క్లిక్ చేయండి.
- ఆ తర్వాత మీకు కొన్ని ఆప్షన్లు కనిపిస్తాయి. అందులో టాప్ ఆప్షన్ "It Shows My Personal Information and I Don't Want It Here" అనే ఆప్షన్పై క్లిక్ చేయాలి.
- ఆ ఆప్షన్పై క్లిక్ చేయగానే ఆ పేజీ గూగుల్ రివ్యూకు వెళుతుంది. గూగుల్ పాలసీని అది ఉల్లంఘిస్తుందా లేదా అనేది ఆ సంస్థ నిర్ధరిస్తుంది. ఒకవేళ ఉల్లంఘించినట్లైతే మీ వ్యక్తిగత సమాచారాన్ని సెర్చ్ నుంచి తొలగిస్తుంది. ఒరిజినల్ సైట్ అలాగే ఉంటుంది. కానీ మీ వ్యక్తిగత సమాచారం సెర్చ్ రిజల్ట్స్లో కనిపించదు.
- ఆ మూడు చుక్కల మెనూలో- పిషింగ్, హింస వంటి కంటెంట్ను తొలగించడం, ఔట్డేటెడ్ సెర్చ్ రిజల్ట్స్ను (మనం సమాచారం తొలగించమని రిక్వెస్ట్ చేసినా గూగుల్ ఓల్డ్ పేజీని ఇండెక్సింగ్ చేయడాన్ని) రిఫ్రెష్ చేసే ఆప్షన్లు కూడా ఉంటాయి.
ఎప్పటికప్పుడు పర్యవేక్షణ
మీ వ్యక్తిగత సమాచారం గూగుల్ సెర్చ్ ఉందో లేదో ఎప్పటికప్పుడు పర్యవేక్షించడం మంచిది. ఇలా చేయడాన్ని గూగుల్ సులభతరం చేసింది. దీనికోసం Results About You అనే గూగుల్ సైట్కు వెళ్లాలి. అనంతరం మీ గూగుల్ అకౌంట్తో లాగిన్ అవ్వాలి. తద్వారా వ్యక్తిగత సమాచారం ఆన్లైన్లో కనిపించినప్పుడు యూజర్లకు నోటిఫికేషన్ వస్తుంది. ఇంతకుముందు ఈ ప్రక్రియలో సైన్ అప్ పేజీ, యూజర్ల వ్యక్తిగత సమాచారం ఎక్కడుందో తెలుసుకోవడం రెండు వేర్వేరు లొకేషన్లలో ఉండేవి.
