Ind vs Aus Boxing Day Test 2025 : బోర్డర్- గావస్కర్ ట్రోఫీ 2024 రసవత్తరంగా సాగుతోంది. ఈ నేపథ్యంలో డిసెంబర్ 26న ప్రారంభం కానున్న బాక్సింగ్ డే టెస్టుకు ఫుల్ క్రేజ్ ఏర్పడింది. మెల్‌బోర్న్‌ వేదికగా ఈ మ్యాచ్ జరగనుంది. ఈ స్టేడియం సీటింగ్ కెపాసిటీ లక్షకుపైనే! అయితే ఈ మ్యాచ్కు ఉన్న డిమాండ్ వల్ల, ప్రారంభానికి ఇంకా 15 రోజుల సమయం ఉన్నప్పటికీ డే- 1 టికెట్లు సోల్డ్ ఔట్ అయ్యాయి.
తొలి రోజుకు సంబంధించి అందుబాటులో ఉన్న పబ్లిక్‌ టికెట్లన్నీ అమ్ముడైనట్లు క్రికెట్ ఆస్ట్రేలియా సోషల్ మీడియాలో వెల్లడించింది. అలాగే డిసెంబర్ 24న స్వల్ప సంఖ్యలో డే 1 టికెట్లు వెబ్సైట్లో అందుబాటులో ఉంచనున్నట్లు పేర్కొంది. యాషెస్ కాకుండా ఇతర జట్ల టెస్టు మ్యాచ్కు ఇంత భారీగా మొత్తంలో టికెట్లు అమ్ముడవడం ఇదే తొలిసారి కావడం విశేషం. కాగా, క్రికెట్లో క్రిస్మస్ తర్వాతి రోజు ప్రారంభమయ్యే టెస్టు (బాక్సింగ్ డే టెస్టు) అత్యంత ప్రతిష్ఠాత్మకంగా భావిస్తారు.
అడిలైడ్ వేదికగా జరిగిన రెండో టెస్టుకు కూడా స్టేడియానికి ప్రేక్షకులు పోటెత్తారు. రెండున్నర రోజుల్లో ముగిసిన ఈ టెస్టుకు మొత్తం 1,35,012 మంది ప్రేక్షకులు హాజరయ్యారు. ఇక 5 మ్యాచ్ల ఈ సిరీస్లో భాగంగా పెర్త్‌ టెస్టులో టీమ్ఇండియా ఘన విజయం సాధించగా, అడిలైడ్ టెస్టులో ఆసీస్‌ గెలిచింది. దీంతో సిరీస్ 1 - 1తో సమం అయ్యింది.
