ఇవి మొటిమలు కావు.. రొసేసియా కావొచ్చట! - ఈ జాగ్రత్తలు తప్పనిసరి!

- ఈ చర్మ సమస్యతో బాధపడుతున్నవారు కోట్లాది మంది! -ఈ చర్యలు పాటిస్తే తీవ్రత తగ్గుతుందంటున్న నిపుణులు

Rosacea Causes and Symptoms in Telugu : అందంగా కనిపించాలని ప్రతి ఒక్కరూ కోరుకుంటారు. కానీ.. మారిన జీవనశైలి, ఆహార అలవాట్లు, కాలుష్యం చర్మంపై తీవ్ర ప్రభావం చూపుతున్నాయి. దాంతో చాలా మంది రకరకాల చర్మ సమస్యలను ఎదుర్కొంటుంటారు. అందులో ముఖం రెడ్​గా మారడం, మొటిమలు వంటివి ఉంటాయి. అయితే.. ముఖంపై మొటిమలు మాదిరిగా కనిపించే.. రోసేసియా కూడా ఈ జాబితాలో ఉంది. మరి, ఈ సమస్య ఎందుకు వస్తుంది? లక్షణాలు ఏంటి? నివారణ చర్యలు వంటి వివరాలు ఈ స్టోరీలో తెలుసుకుందాం..

రొసేసియా అంటే ఏమిటి: రోసేసియా అనేది ముఖం మీద కనిపించే ఒక దీర్ఘకాలిక చర్మ వ్యాధి. ఇది ముఖం ఎర్రబడటం, చిన్న చిన్న రక్తనాళాలు కనిపించడం, ముక్కు పెద్దదవ్వడం వంటి లక్షణాలను కలిగిస్తుంది. అంతేకాకుండా ముఖం మీద ఉండే ఈ పొక్కులు చూడటానికి మొటిమలుగా కనిపించినా.. అవి రొసేసియా వల్ల వస్తుంటాయని నిపుణులు అంటున్నారు.

రొసేసియా రకాలు:

• ఎరిథెమాటోటెలాంజిక్టాటిక్ రోసేసియా: ఇది రోసేసియాలో అత్యంత సాధారణ రకమని నిపుణులు అంటున్నారు. ముఖం ఎర్రబడటం, చిన్న చిన్న రక్తనాళాలు కనిపించడం ఇందులోని ప్రధాన లక్షణాలంటున్నారు. ముఖం మధ్య భాగంలో, ముక్కు, చెంపలు, నుదుటిపై ఎక్కువగా కనిపిస్తుందని అంటున్నారు.
• పాపులోపస్టులర్ రోసేసియా: ఈ రకంలో ముఖం మీద మొటిమలు, పుండ్లు ఏర్పడతాయని అంటున్నారు. ఇది మొటిమలను పోలి ఉంటుందని కానీ మొటిమల కంటే ఎక్కువగా మంట, ఎర్రదనం ఉంటుందని అంటున్నారు.
• ఫైమాటస్ రోసేసియా: ఈ రకంలో ముక్కు చర్మం మందంగా మారి పెద్దగా కనిపిస్తుందని అంటున్నారు. ఇది పురుషులలో ఎక్కువగా కనిపిస్తుందని అంటున్నారు.

ఎవరికి వస్తుంది? : ఈ రొసేసియా అనేది సాధారణంగా అందరికీ వస్తుందని.. కానీ కొద్దిమందికి మాత్రం తీవ్రంగా ఉంటుందని అంటున్నారు. వారు..

• సుమారు 30 నుంచి 40 సంవత్సరాలు పైబడిన వారిలో ఈ సమస్య వచ్చే అవకాశం
• కుటుంబంలో ఎవరికైనా రోసేసియా ఉంటే అది వారి కుటుంబ సభ్యులకు కూడా వచ్చే అవకాశం ఎక్కువ.
• తెల్లని చర్మం ఉన్నవారికి రోసేసియా వచ్చే అవకాశం ఎక్కువంటున్నారు. ముదురు రంగు చర్మం ముఖం ఎర్రబడకుండా కాపాడుతుందని అంటున్నారు.
• పురుషుల కంటే మహిళల్లో రోసేసియా ఎక్కువగా కనిపిస్తుందని చెబుతున్నారు.

రొసేసియా లక్షణాలు: రొసేసియా లక్షణాలు అందరికీ ఒకేలా ఉండవని నిపుణులు అంటున్నారు. ఈ లక్షణాలు వ్యక్తులను బట్టి మారుతుంటాయని చెబుతున్నారు.

• ముందుగా ముఖం రెడ్​ కలర్​లోకి మారుతుందని.. కాలక్రమేణా ఎరుపు రంగు ఎక్కువవుతుందని అంటున్నారు. ముఖ్యంగా ముఖం మధ్య భాగంలో, బుగ్గులు, నుదురు మీద ఎక్కువగా కనిపిస్తుందని చెబుతున్నారు. ఇదే విషయాన్ని నేషనల్​ ఇన్​స్టిట్యూట్​ ఆఫ్​ హెల్త్​ సభ్యుల బృందం స్పష్టం చేస్తోంది(రిపోర్ట్​ కోసం ఇక్కడ క్లిక్​ చేయండి)
• ముఖం మీద చిన్న చిన్న ఎర్రటి లేదా నీలం రంగులో ఉండే రక్తనాళాలు కనిపిస్తాయని అంటున్నారు.
• కొంతమందిలో ముక్కు చర్మం మందంగా మారి పెద్దగా కనిపిస్తుందని.. ఇది తీవ్రమైన లక్షణాలలో ఒకటంటున్నారు. పురుషులలో ఇది ఎక్కువగా కనిపిస్తుందని చెబుతున్నారు.
• ముఖం మీద ఎరుపు రంగు ఉన్న ప్రదేశంలో చిన్న చిన్న మొటిమలు లేదా పుండ్లు ఏర్పడతాయి. ఒక్కొసారి చీము కూడా ఏర్పడుతుంది.
• కొంతమందిలో కళ్లు ఎర్రబడటం, కళ్ల నుంచి నీరు కారడం, కళ్లు మండటం, దురద, కనురెప్పలు ఉబ్బి, కనురెప్పల అడుగుభాగంలో ఎర్రగా మారడం వంటివన్నీ రొసేసియా లక్షణాలుగా చెప్పవచ్చు. వీటిని నిర్లక్ష్యం చేస్తే దృష్టి కోల్పోవడం జరుగుతుందని అంటున్నారు.

రొసేసియా కారణాలు: రోసేసియాకు స్పష్టమైన కారణాలు తెలియనప్పటికీ.. ఈ చర్మ వ్యాధికి దారితీసే కొన్ని కారణాలు ఉన్నాయని నిపుణులు భావిస్తున్నారు. అవేంటంటే..

• కుటుంబంలో ఎవరికైనా రోసేసియా ఉంటే.. అది వారి కుటుంబ సభ్యులకు కూడా వచ్చే అవకాశం అంటున్నారు.
• ఎండ, గాలి, చలి వంటివి రోసేసియాను తీవ్రతరం చేయవచ్చని చెబుతున్నారు.
• కొన్ని రకాల బ్యాక్టీరియా.. ముఖ్యంగా హెలికోబాక్టర్ పైలోరి బ్యాక్టీరియా రోసేసియాను ప్రేరేపించవచ్చని చెబుతున్నారు.
• కారంగా ఉండే ఆహారాలు, ఆల్కహాల్, కెఫెన్ వంటివి రోసేసియా లక్షణాలను తీవ్రతరం చేయవచ్చు.
• ఒత్తిడి, ఆందోళన రోసేసియాను మరింత తీవ్రతరం చేస్తుందని అంటున్నారు.
• కొన్ని చర్మ సంరక్షణ ఉత్పత్తులు చర్మాన్ని చికాకు పెట్టి రోసేసియాను తీవ్రతరం చేయవచ్చని చెబుతున్నారు.

నివారణ చర్యలు: రొసేసియాకు పూర్తి నివారణ లేనప్పటికీ కొన్ని జాగ్రత్తలు పాటించడం వల్ల దాని తీవ్రతను తగ్గించవచ్చంటున్నారు.

• ఎండలోకి వెళ్లేటప్పుడు సన్‌స్క్రీన్ వాడటం ఉత్తమమంటున్నారు.
• చల్లని నీటితో ముఖం కడుక్కోవడం మంచిదంటున్నారు.
• చర్మాన్ని చికాకు పెట్టే రసాయనాలు లేని మృదువైన క్లీనర్‌లను ఉపయోగించండి.
• మసాలా ఆహారం, ఆల్కహాల్, కెఫిన్ తగ్గించాలి.
• నిద్ర లేకపోవడం వల్ల రోసేసియా లక్షణాలు పెరగవచ్చు. కాబట్టి సరిపడా నిద్ర పోవడం మంచిది.
• యోగా, మెడిటేషన్ వంటివి చేయడం వల్ల ఒత్తిడిని తగ్గించవచ్చు.

NOTE : ఇక్కడ మీకు అందించిన ఆరోగ్య సమాచారం, సూచనలు అన్నీ మీ అవగాహన కోసం మాత్రమే. శాస్త్ర పరిశోధనలు, అధ్యయనాలు, వైద్య, ఆరోగ్య నిపుణుల సూచనల ప్రకారమే మేము ఈ సమాచారాన్ని అందిస్తున్నాం. కానీ, వీటిని పాటించే ముందు కచ్చితంగా మీ వ్యక్తిగత వైద్యుల సలహాలు తీసుకోవడమే మంచిది.