தேனி மக்களவைத் தொகுதி அதிமுக வேட்பாளராக துணை முதலமைச்சர் ஓபிஎஸ் மகன் ரவீந்திரநாத்குமர் போட்டியிடுகிறார். தொகுதியில் தான் வெற்றிப் பெற வேண்டும் என்ற நோக்கில் வாக்காளர்களுக்கு பணம், சேலை, வேஷ்டிகள் உள்ளிட்டவைகளை தொகுதி முழுவதும் சப்ளை செய்து வருவதாக பொதுமக்கள் குற்றம் சாட்டுகின்றனர்.
இதனைத் தொடர்ந்து கம்பம், பெரியகுளம் உள்ளிட்ட பகுதிகளில் வாக்காளர்களுக்கு கொடுக்க இருந்த வேஷ்டி, சேலைகள் கடந்த சில தினங்களுக்கு முன்பு பறிமுதல் செய்யப்பட்டது.
இந்நிலையில், தேனி மாவட்டம் போடிநாயக்கனூர் அருகே உள்ள மேல சொக்கநாதபுரம் பேரூராட்சி அதிமுக முன்னாள் சேர்மன், சவீதா அருண்பிரசாத் தலைமையில் வாக்குச்சீட்டுடன் ரூ.2000 பணமும் வாக்காளர்களுக்கு வழங்கிவருகின்றனர்.
இதுதொடர்பான வீடியோ தற்போது சமூக வலைதளங்களில் வெளியாகி உள்ளது. எனவே ஓட்டுக்கு பணம் கொடுக்கும் அதிமுகவினர் மீது தேர்தல் ஆணையம் உரிய நடவடிக்கை எடுக்க வேண்டும் என சமூக செயற்பாட்டாளர்கள் வலியுறுத்திவருகின்றனர்.
