சேலம் மாவட்டம், ஆட்டையாம்பட்டியைச் சேர்ந்தவர் அறிவு என்கின்ற அறிவுச்செல்வன் (34). கறி கடை ஒன்றில் வேலைக்கு சென்று வந்தார். இவர் தினமும் குடித்துவிட்டு வந்து மனைவி பார்வதியுடன் தகராறு செய்து வந்தார். அதனால், தனது மகன்களான கருணாஸ், கோகுல்ராஜ் ஆகியோரை அழைத்துக்கொண்டு ஆட்டையாம்பட்டியில் உள்ள தனது பெற்றோர் வீட்டுக்கு பார்வதி அழைத்து சென்று விட்டார்.
இதனால் அறிவுச்செல்வன் தனியே வசித்து வந்தார்.
இந்த நிலையில் இன்று அதிகாலை அறிவுச்செல்வன் வீடு திறந்து கிடந்தது. இதனால் சந்தேகம் அடைந்த அக்கம்பக்கத்தினர் கதவை திறந்து பார்த்தனர். அங்கு அறிவுச்செல்வன் சரமாரியாக வெட்டிக் கொலை செய்யப்பட்டு ரத்த வெள்ளத்தில் இறந்து கிடந்தார். இதை கண்டு அதிர்ச்சி அடைந்த பொதுமக்கள், இது குறித்து ஆட்டையாம்பட்டி காவல் நிலையத்திற்கு தகவல் அளித்தனர். சம்பவ இடத்திற்கு வந்த ஆய்வாளர் குலசேகரன் மற்றும் காவலர்கள், அறிவுச்செல்வனின் சடலத்தை மீட்டு உடற்கூறு ஆய்வுக்காக சேலம் அரசு மருத்துவமனைக்கு அனுப்பி வைத்தனர்.
மேலும், சேலம் மாவட்ட காவல் கண்காணிப்பாளர் தீபா கணிகர் தலைமையில் தனிப்படை அமைக்கப்பட்டது. இதில் உள்ள நான்கு குழுக்கள் பல்வேறு கோணங்களில் விசாரணை நடத்தி வருகின்றனர். முதற்கட்ட விசாரணையில், அறிவு செல்வனுக்கும் அதே பகுதியை சேர்ந்த இளம்பெண்ணுக்கும் கள்ளத்தொடர்பு இருந்துள்ளது. இந்தக் கள்ளக் காதலை விடுமாறு அந்தப் பெண்ணின் உறவினர்கள் அறிவுச்செல்வன் மற்றும் அப்பெண்ணிடம் வற்புறுத்தி வந்துள்ளனர். ஆனால் இருவரும் கள்ளக்காதலை விடவில்லை. பலமுறை கூறியும் அறிவுச்செல்வன் கள்ளக்காதலை கைவிடாததால் அப்பெண்ணின் உறவினர்கள் அறிவுச்செல்வன் கொலை செய்து இருக்கலாம் என தெரியவந்துள்ளது. இந்தக் கொலை தொடர்பாக ஆட்டையாம்பட்டியைச் சேர்ந்த 4 வாலிபர்களிடம் தனிப்படை போலீசார் விசாரணை செய்து வருகின்றனர்.
இந்தக் கொலை சம்பவம் ஆட்டையாம்பட்டி பகுதியில் பெரும் பரபரப்பை ஏற்படுத்தி உள்ளது.
