கரூர்: மண்மங்கலம் வட்டத்திற்கு உள்பட்ட ஆத்தூர் தொடக்க வேளாண்மை கூட்டுறவு கடன் சங்கம் மாங்காசோளிபாளையம் அருகே செயல்பட்டு வருகிறது. இந்த கூட்டுறவு சங்கத்தின் தலைவராக கருமணன் என்பவர் செயல்படுகிறார். அங்கு, கம்ப்யூட்டர் ஆப்பரேட்டராக, தலைவரின் உறவினர் சதிஷ்குமார் பணியாற்றி வருகின்றார்.
இந்த கூட்டுறவு கடன் சங்கத்தில் விவசாயிகளுக்கு பயிர் கடன், நகை பயிர் கடன், தனிநபர் நகை கடன் வழங்கப்பட்டுள்ளது. இந்த சங்கத்தில் ஆயிரத்து 275 பேர் உறுப்பினராக உள்ளனர். சட்டப்பேரவை தேர்தலுக்கு முன்பாக கடந்த ஜனவரி 31ஆம் தேதி தமிழ்நாடு முழுவதும் விவசாய கடன் தள்ளுபடி செய்யப்பட்டதாக அப்போதைய அதிமுக அரசு அறிவித்தது.
சங்கத்தில் திமுகவினர் இந்தத் திட்டத்தில் பயன்பெற்றுவிடக்கூடாது என்பதற்காக திமுகவினரை தவிர்த்து மற்றவர்களின் கணக்குகளில் பயிர் கடன் தள்ளுபடி உள்ளிட்ட நடவடிக்கைகளை மேற்கொண்டுள்ளதாக கூறப்படுகிறது. அதிலும், கடன் வாங்கிய விவசாயிகள் பயிர்க்கடனை திருப்பி செலுத்தியுள்ளனர். அந்தப் பணத்தை வாங்கிய சதிஷ்குமார் அதற்குரிய ரசீதை வழங்கவில்லை.
கூட்டுறவு கடன் சங்கத்தில் ஆய்வு
மேலும், பயிர் கடன், பயிர் நகை கடன் வாங்கியவர்களின் கடன்களை நகைக் கடனுக்கு தன்னிச்சையாக விவசாயிகளின் ஒப்புதல் இல்லாமல் மாற்றியுள்ளனர். இதனால், தமிழ்நாடு அரசு அறிவித்த அந்த தள்ளுபடி விவசாயிகளுக்கு கிடைக்காமல் இவர்கள் இடையில் புகுந்து சதி செய்துள்ளனர்.
இது தொடர்பாக கூட்டுறவு துறை உயர் அலுவலர்களுக்கு அளித்த புகாரின் பேரில் ஜூலை 30ஆம் தேதி மாங்காசோளிபாளையத்தில் செயல்படும் கூட்டுறவு கடன் சங்கத்தில் தான்தோன்றிமலை கூட்டுறவு சார்பதிவாளர் ரமேஷ் நேரில் ஆய்வு செய்தார். இந்த ஆய்வில் முதல்கட்டமாக பயிர் கடன் பெற்ற விவசாயிகள் கணக்கில் 9 லட்சத்து 46 ஆயிரம் ரூபாய் மோசடி செய்துள்ளதும், தனிநபர் நகைக்கடன் வரவு செலவில் 7 லட்சத்து 50 ஆயிரம் ரூபாய் மோசடி செய்ததும் தெரியவந்தது.
இதுதொடர்பாக சம்பந்தப்பட்ட சதிஷ்குமாரிடம் கேட்டபோது, தான் அந்த பணத்தை கையாடல் செய்துவிட்டதாகவும், ஒரு மாதத்திற்குள் இந்த பணத்தை திருப்பி செலுத்துவதாகவும் தெரிவித்து, ஒரு கடிதத்தில் மோசடி செய்த விவரங்களை எழுதி கையொப்பம் செய்து கொடுத்ததுடன், உறுப்பினர்கள் முன்பு வாக்குமூலமும் அளித்தார்.
கூட்டுறவு சங்க அலுவலகம் முற்றுகை
மோசடி செய்தவர் சங்கத் தலைவர் கருமணன் உறவினர் என்பதால், சங்கத் தலைவருக்குத் தெரியாமல் அந்த மோசடி நடக்க வாய்ப்பு இல்லை என ஆத்தூர் பூலாம்பாளையம் ஊராட்சி மன்ற தலைவர் செல்லை சிவா தலைமையில் சங்க உறுப்பினர்கள், பொதுமக்கள் குற்றஞ்சாட்டினார்.
சதிஷ்குமார் அந்த பணத்தை செலுத்த தவறினால், தலைவராக இருக்கும் நீங்கள்தான் செலுத்த வேண்டும் என கூறியதை தொடர்ந்து அதற்கு கருமணனும் ஒத்துக்கொண்டார். தொடக்க வேளாண்மை கூட்டுறவு கடன் சங்கத்தில் மோசடி குறித்து ஆய்வு மேற்கொள்ளும் தகவல் தெரிந்த அப்பகுதி விவசாயிகள் கூட்டுறவு கடன் சங்கத்தில் முற்றுகையிட்டனர்.
நடவடிக்கை எடுக்கக் கோரிக்கை
இது குறித்து ஆத்தூர் பூலாம்பாளையம் ஊராட்சி மன்ற தலைவர் செல்லை சிவா கூறும்போது, “திமுக கட்சியைச் சேர்ந்தவர் என்பதாலேயே என்னைப்போன்ற 10 பேருக்கு அதிமுக அரசில் விவசாய கடன் தள்ளுபடி செய்யப்படவில்லை. தற்போது 17 லட்சம் ரூபாய் அளவில் மோசடி செய்தது தெரியவந்துள்ளது.
கடந்த ஆட்சியின்போது நடந்த இந்த மோசடி குறித்து அலுவலர்கள் முழுமையாக ஆய்வு செய்து, பாதிக்கப்பட்டவர்களுக்கு முழுமையான இழப்பீடு வழங்க வேண்டும். தொடர்ந்து இந்த கூட்டுறவு கடன் சங்கம் சிறப்பாக செயல்பட அரசு வழிவகை செய்ய வேண்டும். தவறு செய்தவர்கள் மீது உரிய நடவடிக்கை எடுக்க வேண்டும்” என்றார்.
மேலும், இதேபோல் 225 பேருக்கு கடன் தள்ளுபடி செய்யப்பட்டுள்ளது. அவர்களது அனைத்து ஆவணங்களையும் சரி செய்த பிறகு மொத்த மோசடி எவ்வளவு என்பது தெரியவரும். எனவே கணக்கு வழக்குகள் அனைத்தும் சரிபார்த்து உரிய நடவடிக்கை எடுக்க வேண்டும் எனவும் கேட்டுக்கொண்டனர்.
ஏற்கனவே கரூர் மாவட்டத்தில் இயங்கும் கூட்டுறவு கடன் சங்கங்களில் இதே பாணியில் கடன் மோசடி நடைபெற்றிருப்பதாக கூறப்படுவதால் அனைத்து கூட்டுறவு கடன் சங்கங்களில் ஆவணங்களை சரிபார்த்து விசாரணை மேற்கொள்ள வேண்டும் என்ற கோரிக்கை எழுந்துள்ளது.
இதையும் படிங்க: வங்கியில் ரூ.12.52 கோடி மோசடி: பிரபல நிறுவனத்தில் சிபிஐ அதிரடி சோதனை
