நீட் தேர்வு முடிவுகள் இன்று வெளியீடு!
நீட் மருத்துவ நுழைவுத் தேர்வு முடிவுகள் இன்று (அக்.16) வெளியாகின்றன. மருத்துவ படிப்புகளுக்கான நீட் நுழைவுத் தேர்வு கரோனா காரணமாக தாமதமாக கடந்த செப்டம்பர் 13ஆம் தேதி நடத்தப்பட்டது. இத்தேர்வை நாடு முழுவதிலும் இருந்து 14 லட்சத்து 37 ஆயிரம் பேர் எழுதினர். கடந்த மாதம் நீட் தேர்வு எழுத முடியாத மாணவர்களுக்கு அக்.14ஆம் தேதி மறுதேர்வு நடந்தது நினைவு கூரத்தக்கது.
ஆம்னி பேருந்துகள் இன்று முதல் இயக்கம்
தமிழ்நாட்டில் கரோனா காரணமாக நிறுத்தப்பட்ட ஆம்னி பேருந்துகள் சேவை இன்று முதல் தொடங்கப்படுகிறது. இதற்காக ஆம்னி பேருந்துகளை சுத்தப்படுத்தி தயார் செய்யும் பணிகள் தீவிரமாக நடைபெற்று வருகிறது. அரசு விதித்துள்ள பாதுகாப்பு விதிமுறைகளை பின்பற்றி ஆம்னி பேருந்துகள் இயக்கப்படும் என்று பேருந்து உரிமையாளர்கள் தெரிவித்துள்ளனர்.
திருப்பதியில் நவராத்திரி பிரம்மோற்சவ விழா தொடக்கம்
பிரசித்தி பெற்ற திருப்பதி ஏழுமலையான் கோயில் நவராத்திரி பிரம்மோற்சவ விழா இன்று தொடங்குகிறது. ஏழுமலையான் கோயிலில் இரண்டு ஆண்டுகளுக்கு ஒருமுறை நவராத்திரி பிரம்மோற்சவ விழா நடைபெறும்.
கரோனா பரவல் காரணமாக வீதி உலாவிற்கு அனுமதி மறுக்கப்பட்டுள்ள நிலையில், கல்யாண மண்டபத்தில் அருள்மிகு மலையப்ப சுவாமி புதுப் புது பட்டாடை உடுத்தி பல்வேறு வாகனங்களில் எழுந்தருளி பக்தர்களுக்கு காட்சி அளிக்க உள்ளார்.
ஆன்லைன் ஷாப்பிங்... அட்டகாசமான ஆஃபர் அறிவிப்பு
அமேசான் தனது கிரேட் இந்தியன் ஃபெஸ்டிவல் விற்பனையை இன்று முதல் தொடங்கி உள்ளது. அமேசான் தனது சொந்த தயாரிப்புகளான அமேசான் எக்கோ ஸ்மார்ட் ஸ்பீக்கர்கள், அமேசான் ஃபயர் டிவி ஸ்டிக், கிண்டில் இ-ரீடர் மற்றும் பலவற்றை 50% வரை தள்ளுபடியில் விற்பனை செய்கிறது.
அதேபோல், பிளிப்கார்ட்டின் சிறப்பு சலுகையான பிக் பில்லியன் டே இன்று முதல் தொடங்கி வரும் 21ஆம் தேதி முடிவடைகிறது. வீட்டிற்கு தேவையான பொருட்கள், நியூ மாடல் செல்போன்கள், எலக்ரானிக் பொருட்ளுக்கான சலுகைகளை இரண்டு நிறுவனங்களும் போட்டி போட்டுக் கொண்டு அறிவித்துள்ளன.
புத்தம் புது காலை இன்று வெளியீடு
'புத்தம் புது காலை' என்ற தலைப்பில் சுதா கொங்கரா, கவுதம் மேனன், சுஹாசினி மணி ரத்னம், ராஜீவ் மேனன் மற்றும் கார்த்திக் சுப்பராஜ் ஆகிய ஐந்து இயக்குநர்கள் இயக்கியுள்ள ஆந்தாலஜி படம் அமேசான் ப்ரைம் ஓடிடி தளத்தில் இன்று வெளியானது.
காளிதாஸ் ஜெயராம், ஜெயராம், ஆண்ட்ரியா, ஸ்ருதி ஹாசன், அனு ஹாசன், சுஹாசினி, எம்.எஸ். பாஸ்கர் மற்றும் ரித்து வர்மா உள்ளிட்ட பலர் இந்த ஆந்தாலஜி படத்தில் நடித்திருக்கின்றனர்.
இன்றைய ஐபிஎல் போட்டி
ஐபிஎல் தொடர் 13ஆவது சீசனில் இன்று நடைபெறும் 32ஆவது லீக் ஆட்டத்தில் ரோஷித் ஷர்மா தலைமையிலான மும்பை இந்தியன்ஸ் அணியும், தினேஷ் கார்த்திக் தலைமையிலான கொல்கத்தா நைட் ரைடர்ஸ் அணியும் மோதுகின்றன.
