நடிகை குஷ்பு 'வருஷம் 16' படத்தின் மூலம் தமிழ்சினிமாவில் நாயகியாக அறிமுகமானார். தொடர்ந்து ரஜினி, கமல், சரத்குமார் உள்ளிட்ட பல முன்னணி கதாநாயகர்களுடன் நடித்து பல வெற்றிப் படங்களை கொடுத்துள்ளார்.
இதனால் குஷ்புவுக்கு இப்போதும் தனி ரசிகர்கள் பட்டாளம் உள்ளது. அவருக்கென்று தமிழ்நாட்டில் தனி கோயில் கூட எழுப்பப்பட்டது. அதே போன்று 'குஷ்பு இட்லி' இன்னும் கிடைக்கிறது. தற்போது இவர் தொலைக்காட்சி நிகழ்ச்சியை தொகுத்து வழங்கியும் தொலைக்காட்சி தொடரிலும் நடித்து வருகிறார்.
அதேபோல் அரசியல் கட்சியிலும் இருந்து வருகிறார். இந்நிலையில் குஷ்பு தற்போது லண்டனில் விடுமுறையைக் கழித்து வருகிறார்.
இந்நிலையில், குஷ்பு அங்கு ஷாப்பிங் சென்றுள்ளார். அங்கு ஒரு கடையில் மொபைல் பேக் கவரில் சூப்பர் ஸ்டார் ரஜினிகாந்தின் தோற்றத்தை போன்ற கவரை புகைப்படம் எடுத்து, தனது ட்விட்டர் பக்கத்தில் பதிவேற்றம் செய்துள்ளார்.
அதில், 'லண்டன் ஆக்ஸ்போர்டு தெருவில் உள்ள ஒரு கிஃப்ட் ஷாப்பில் நான் கண்டதைப் பாருங்கள்...!!! நம்ம சூப்பர் ஸ்டார்' என்று பதிவிட்டார்.
இதை பார்த்த நெட்டிசன் ஒருவர், 'அது நம்ம சூப்பர் ஸ்டார் ரஜினி இல்லை. கத்தாரின் மன்னர் தமீம் பின் அகமத், அவர் கத்தாரின் சூப்பர் ஸ்டார்' எனத் தெரிவித்தார்.
இதுகுறித்து மறு ட்வீட்டில் குஷ்பு, 'தவறை திருத்தியதற்கு நன்றி. எனது தவறுக்கு மன்னிக்கவும். ஃபிளிப் ஹேருடன் இருப்பவர் எங்களுக்கு சூப்பர் ஸ்டார் தான். அந்த கடைக்காரரும் அப்படித்தான் தெரிவித்தார்.
அது நம்முடைய சூப்பர் ஸ்டார் இல்லை. என் தவறை திருத்திய எனது நல்ல நண்பர்களுக்கு நன்றி. தவறை ஏற்றுக்கொள்வது, நீங்கள் வளரத் தயாராக இருப்பதைக் காட்டுகிறது. நானும் அப்படிதான் தவறுகளிலிருந்து கற்றுக் கொள்ளுதல் மனித நேயம்' என அதில் தெரிவித்திருந்தார்.
