சென்னையில் கரோனா தொற்று அதிகரித்து வரும் சூழலில், மேற்கொள்ள வேண்டிய நடவடிக்கைகள் குறித்து அமைச்சர்கள், அலுவலர்களுடன் மாநகராட்சி அலுவலகத்தில் உள்ள அம்மா மாளிகை அரங்கில், முதலமைச்சர் எடப்பாடி பழனிசாமி ஆலோசனை நடத்தினார். ஆலோசனைக்குப் பின்னர் பேசிய அவர், “கரோனா பரவலைக் கட்டுப்படுத்த போர்க்கால நடவடிக்கைகளை மேற்கொண்டு வருகிறோம். அதிக மக்கள்தொகை கொண்ட பகுதி என்பதால் சென்னையில் வேகமாக கரோனா பரவுகிறது. பாதிக்கப்பட்ட பகுதிகளில் மூன்று வேளையும் கிருமி நாசினி தெளிக்கப்படுகிறது.
மாநிலம் முழுவதும் நோய்த் தடுப்புப் பணிக்காக ஐஏஎஸ் அலுவலர்கள் கொண்ட குழுக்கள் அமைக்கப்பட்டுள்ளன. 50 நோய் கண்டறியும் மையங்கள் மூலம் நாள்தோறும் 12 ஆயிரம் பேருக்கு சோதனைகள் செய்யப்படுகின்றன. அம்மா உணவகம் மூலமாக நாள் ஒன்றுக்கு ஏழு லட்சம் பேருக்கு உணவளித்து வருகிறோம். ஊரடங்கு உத்தரவால் பொதுமக்கள் பாதிக்காத வகையில், நியாயவிலைக் கடைகள் மூலம் ஏப்ரல் மற்றும் மே மாத அத்தியாவசியப் பொருள்கள் விலையில்லாமல் வழங்கப்பட்டுள்ளன. அதேபோல், ஜூன் மாத பொருள்களும், நியாயவிலைக் கடைகள் மூலம் விலையில்லாமல் வழங்கப்படும்.
மற்ற மாநிலங்களைக் காட்டிலும் கரோனா பரவலைக் கட்டுப்படுத்த பல நடவடிக்கைகளை எடுத்துள்ளோம். நடமாடும் சோதனை வாகனங்கள் மூலம், மக்கள் வசிக்கும் பகுதிகளுக்கே சென்று பரிசோதனை செய்யப்படுகிறது. கரோனா பாதித்தவர்களுக்கு ஜிங்க் போன்ற சத்து மாத்திரைகள், கபசுரக் குடிநீர் வழங்கப்படுகின்றன.
மத்திய அரசின் வழிகாட்டுதலின்படி சில தொழில்களை மேற்கொள்ள அனுமதி வழங்கப்பட்டுள்ளது. இங்குள்ள சுமார் 50 ஆயிரம் வெளிமாநிலத் தொழிலாளர்கள் அவரவர் சொந்த மாநிலங்களுக்குச் செல்ல, பணிகள் மேற்கொள்ளப்பட்டு வருகின்றன. வெளிமாநிலத் தொழிலாளர்கள் தங்கி பணிபுரிய விரும்பினால் இங்கேயே இருக்கலாம். பொதுமக்கள் அனைவரும் முகக்கவசம், தனிநபர் இடைவெளியைக் கண்டிப்பாக கடைப்பிடிக்க வேண்டும்“ எனக் கூறினார்.
இதையும் படிங்க: சென்னையில் அதிகரிக்கும் கரோனா - ரிப்பன் மாளிகையில் முதலமைச்சர் ஆய்வு!
