சென்னை: தமிழ் சினிமாவில் இந்த வார இறுதியில் மூன்று திரைப்படங்கள் வெளியாகின்றன. ஆதி நடிப்பில் ’சப்தம்’, ஜீவா, அர்ஜுன் நடித்த ’அகத்தியா’, எஸ்.ஏ.சந்திசேகர் நடித்துள்ள ’கூரன்’ ஆகிய திரைப்படங்கள் தான் அவை. இவற்றில் ’சப்தம்’ திரைப்படமும் ’அகத்தியா’ திரைப்படமும் ஹாரர் ஜானரில் எடுக்கப்பட்டுள்ளன. இந்த இரு படங்களுக்குமான எதிர்பார்ப்புகள் இருக்கின்றன.
ஏற்கனவே கடந்த வாரம் வெளியான ’டிராகன்’ திரைப்படமும் திரையரங்குகளில் வெற்றிகரமாக ஓடிக்கொண்டிருக்கிறது. இந்நிலையில் இந்த வார ஓடிடி வெளியீடாக தமிழில் திரைப்படங்கள் மட்டுமல்லாமல் முக்கியமான வெப் சீரிஸ் ஒன்றும் வெளியாகவுள்ளது. அவை என்னென்ன என்பதை இத்தொகுப்பில் பார்க்கலாம்.
பராரி
ஹரிஷங்கர், சங்கீதா கல்யாண் நடிப்பில் எழில் பெரியவேடி இயக்கத்தில் உருவாகியுள்ள படம் 'பராரி' .இயக்குனர் ராஜு முருகன் இந்த படத்தை வழங்கியுள்ளார். கலா பிலிம்ஸ் நிறுவனம் இந்த படத்தை தயாரித்துள்ளது. அடித்தட்டு மக்களுக்குள்ளும் இருக்கும் சாதிய பிரச்சனைகளை மிக இயல்பாக ஆணித்தரமாக பேசக்கூடிய படமாக பராரி இருக்கிறது.
கடந்த ஆண்டு நவம்பர் 22ஆம் தேதி பராரி திரைப்படம் திரையரங்குகளில் வெளியானது. சாதரண வாழ்வியலின் உணர்வுபூர்வமான காட்சிகள் வழியே மனதிற்கு நெருக்கமான கதையை சொல்லியுள்ளனர். இந்நிலையில் தற்போது பராரி திரைப்படம் பிப்ரவரி 28ஆம் தேதி ஆஹா தமிழ் ஓ.டி.டி தளத்தில் வெளியாக உள்ளது.
விடாமுயற்சி
அஜித்குமார் நடிப்பில் இரண்டு ஆண்டுகளுக்கு பிறகு வெளியான திரைப்படம் விடாமுயற்சி. மகிழ் திருமேனி இயக்கிய இப்படத்தில் அஜித்துடன் திரிஷா, அர்ஜுன், ரெஜினா, ஆரவ் உள்ளிட்ட பலர் நடித்திருந்தனர். அனிருத் இந்த படத்துக்கு இசையமைத்திருந்தார். முழுக்க முழுக்க அஜார்பைஜானில் படம்பிடிக்கப்பட்ட ’விடாமுயற்சி’ திரைப்படத்தில் ஓம் பிரகாஷின் ஒளிப்பதிவு பரவலாக பாரட்டப்பெற்றது.
மாஸ் காட்சிகள் பெரிதாக இல்லாமல் ஹாலிவுட் தரத்தில் இத்திரைப்படம் உருவாக்கப்பட்டிருந்தது. பிப்ரவரி 6ஆம் தேதி வெளியான விடாமுயற்சி திரைப்படம் தற்போது மார்ச் 3ஆம் தேதி நெட்ஃப்ளிக்ஸ் ஓடிடி தளத்தில் வெளியாகவுள்ளது.
பாட்டல் ராதா
தினகரன் சிவலிங்கம் இயக்கத்தில் குரு சோமசுந்தரம், சஞ்சனா உள்ளிட்ட பலர் நடிப்பில் உருவான திரைப்படம் ’பாட்டல் ராதா’. குடிப்பழக்கத்தால் அடிமையாகி இருக்கும் நபரின் வாழ்க்கையிலும், அவரது குடும்பத்திலும் ஏற்படும் பிரச்சனைகளை நகைச்சுவையாகவும் உணர்வுப்பூர்வமாகவும் கடத்திய திரைப்படம். இயக்குநர் பா.ரஞ்சித் இந்த படத்தை தயாரித்திருந்தார். மக்களிடையே இப்படத்திற்கு நல்ல வரவேற்பு கிடைத்தது. இப்படம் ஆஹா தமிழ் ஓடிடி தளத்தில் வெளியாகியுள்ளது.
சங்கராந்திகி வஸ்துன்னம்
இயக்குநர் அனில் ரவிப்புடி இயக்கத்தில் வெங்கடேஷ், ஐஸ்வர்யா ராஜேஷ், மீனாட்சி சௌத்ரி உள்ளிட்டோர் நடிப்பில் சங்கராந்தி பண்டிகைக்கு வெளியான திரைப்படம் 'சங்கராந்திகி வஸ்துன்னம்'. 50 கோடி ரூபாய் பட்ஜெட்டில் எடுக்கப்பட்ட இப்படம் தெலுங்கில் மட்டும் வெளியாகி 200 கோடி ரூபாய்க்கும் மேல் வசூல் செய்து வசதியுள்ளது.
சங்கராந்தி பண்டிக்கைக்கு வெளியான ’கேம் சேஞ்சர்’ போன்ற படங்களைவிட அதிக வசூல் செய்த தெலுங்கு படமாக மாறியுள்ளது. முழுக்க முழுக்க குடும்ப நகைச்சுவை திரைப்படமாக வெளிவந்த இத்திரைப்பட மார்ச் 1ம் தேதி ஜீ5 ஓடிடி தளத்தில் வெளியாகிறது. திரையரங்குகளில் நன்றாக ஓடியதால் இந்த படத்தின் ஓடிடி வெளியீடு ஒரு மாதம் தள்ளி வைக்கப்பட்டது குறிப்பிடத்தக்கது.
சுழல் 2 The Vortex சீசன் 2
இதுவரை தமிழில் வெளிவந்த வெப்சீரிஸ்களில் முக்கியமான வெப் சீரிஸ் சுழல். 2022ஆம் ஆண்டு அமேசான் ப்ரைம் ஓடிடி தளத்தில் வெளியான சுழல் வெப் சீரிஸானது குற்றம், மர்மம், விசாரணை, சஸ்பென்ஸ் என பல்வேறு தளங்களில் அசத்தலாக வெளி வந்திருந்தது. பல்வேறு ரசிகர்களையும் கவர்ந்த தொடராக உள்ளது. கதிர், ஐஸ்வர்யா ராஜேஷ், பார்த்திபன், குமரவேல், ஸ்ரேயா ரெட்டி என பலர் நடித்திருந்த இந்த சுழல் வெப் சீரிஸ் மலைக் கிராமத்தில் நடப்பதாக அமைக்கப்பட்டிருந்தது.
அது இன்னும் ரசிகர்களிடையே வரவேற்பை பெற்றது. இந்த வெப்சீரிஸின் இரண்டாவது சீசன் எப்போது வெளியாகும் என அதிகம் எதிர்பார்க்கப்பட்ட நிலையில் சமீபத்தில் சுழல் சீசன் 2க்கான அறிவிப்பு வெளியாகியது. தற்போது அதன் இரண்டாவது சீசனான சுழல் The Vortex பிப்ரவரி 28ஆம் தேதி வெளியாகிறது. முதல் சீசனை உருவாக்கிய இயக்குநர்கள் புஷ்கர், காயத்ரியே இந்த சீசனையும் உருவாக்கியுள்ளனர். இந்த சீசனில் கடலும் கடல் சார்ந்த கிரமமாக கதை உருவாகியுள்ளது என்பதை டிரெய்லரில் இருந்து தெரிந்துகொள்ளலாம்.
லவ் அண்டர் கன்ஸ்ட்ரக்ஷன்
மலையாளத்தில் உருவாகியுள்ள நகைச்சுவை வெப் சீரிஸ் Love Under Construction. புது வீடு கட்டும் கனவை நினைவாக்கும் இளைஞர் ஒருவர் எதிர்கொள்ளும் சிக்கல்கள் மற்றும் காதலை நிறைவேற்ற எதிர்கொள்ளும் சிக்கல்களே கதைக்களம். இத்தொடர் பிப்ரவரி 28ம் தேதி ஜியோ ஹாட் ஸ்டார் ஓடிடி தளத்தில் வெளியாகிறது.
டப்பா கார்டெல்
ஷபானா ஆஸ்மி, ஜோதிகா, நிமிஷா சஜயன், ஷாலினி பாண்டே, அஞ்சலி ஆனந்த் ஆகியோர் முக்கியமான கதாபாத்திரங்களில் நடித்துள்ள இந்த வெப் சீரியஸை ஹிதேஷ் பாட்டியா இயக்கியுள்ளார். தானேவில் வாழும் ஐந்து சராசரி குடும்பத்து பெண்கள் செய்யும் அசாதரணமான வேலைகளையும் அவர்களது நெருக்கடிகளையும் த்ரில்லர் பாணியில் பேசும் தொடர் இது. பிப்ரவரி 28ஆம் தேதி நெட்ஃப்ளிக்ஸ் ஓடிடி தளத்தில் வெளியாகிறது.
