ਆਰੀਅਨ ਖਾਨ ਮਾਮਲਾ: ਗਵਾਹ ਦਾ ਸਨਸਨੀਖੇਜ਼ ਦਾਅਵਾ, ਸਮੀਰ ਵਾਨਖੇੜੇ ਨੂੰ ਪੈਸੇ ਦੇਣ ਲਈ ਹੋਈ ਸੀ ਡੀਲ !

ਮੁੰਬਈ ਡਰੱਗਜ਼ ਮਾਮਲੇ ਵਿਚ ਇਕ ਗਵਾਹ ਨੇ ਸਨਸਨੀਖੇਜ਼ ਦਾਅਵਾ ਕੀਤਾ ਹੈ। ਉਸ ਦਾ ਕਹਿਣਾ ਹੈ ਕਿ ਪੂਰੇ ਮਾਮਲੇ ਵਿਚ ਪੈਸੇ ਨੂੰ ਲੈ ਕੇ ਡੀਲ ਹੋਈ ਸੀ। ਉਸ ਮੁਤਾਬਕ 18 ਕਰੋੜ ਵਿਚ ਡੀਲ ਕੀਤੀ ਗਈ। ਇਸ ਵਿਚੋਂ 8 ਕਰੋੜ ਐੱਨ.ਸੀ.ਬੀ. ਦੇ ਜ਼ੋਨਲ ਡਾਇਰੈਕਟਰ ਸਮੀਰ ਵਾਨਖੇੜੇ ਨੂੰ ਦੇਣ ਦਾ ਫੈਸਲਾ ਕੀਤਾ ਗਿਆ ਸੀ। ਐੱਨ.ਸੀ.ਬੀ. ਨੇ ਇਸ ਨੂੰ ਏਜੰਸੀ ਨੂੰ ਬਦਨਾਮ ਕਰਨ ਦੀ ਸਾਜ਼ਿਸ਼ ਦੱਸਿਆ ਹੈ।

ਮੁੰਬਈ: ਆਰੀਅਨ ਖਾਨ ਡਰੱਗਜ਼ ਮਾਮਲੇ ਵਿਚ ਇਕ ਨਵੇਂ ਖੁਲਾਸੇ ਨਾਲ ਕੇਸ ਦੀ ਦਿਸ਼ਾ ਮੁੜ ਸਕਦੀ ਹੈ। ਇਕ ਗਵਾਹ ਨੇ ਐੱਨ.ਸੀ.ਬੀ. ਦੇ ਜ਼ੋਨਲ ਮੁਖੀ ਸਮੀਰ ਵਾਨਖੇੜੇ 'ਤੇ ਪੈਸੇ ਲੈ ਕੇ ਡੀਲ ਕਰਨ ਨੂੰ ਲੈ ਕੇ ਗੱਲਬਾਤ ਕਰਨ ਦਾ ਦੋਸ਼ ਲਗਾਇਆ ਹੈ। ਉਸ ਨੇ ਮਾਮਲੇ ਵਿਚ ਦੂਜੇ ਗਵਾਹ ਕੇ.ਪੀ. ਗੋਸਾਵੀ 'ਤੇ ਵੀ ਗੰਭੀਰ ਦੋਸ਼ ਲਗਾਏ ਹਨ। ਕਰੂਜ਼ 'ਤੇ ਛਾਪੇਮਾਰੀ ਦੇ ਸਮੇਂ ਗੋਸਾਵੀ ਅਤੇ ਆਰੀਅਨ ਦੀ ਤਸਵੀਰ ਵਾਇਰਲ ਹੋਈ ਸੀ। ਇਸ ਤਸਵੀਰ ਵਿਚ ਗੋਸਾਵੀ ਆਰੀਅਨ ਦੇ ਨਾਲ ਸੈਲਫੀ ਲੈਂਦੇ ਹੋਏ ਦਿਖ ਰਹੇ ਹਨ। ਹਾਲਾਂਕਿ, ਐੱਨ.ਸੀ.ਬੀ. ਨੇ ਇਨ੍ਹਾਂ ਦੋਸ਼ਾਂ ਨੂੰ ਸਿਰੇ ਤੋਂ ਖਾਰਿਜ ਕਰ ਦਿੱਤਾ ਹੈ।

ਗਵਾਹ ਪ੍ਰਭਾਕਰ ਦਾ ਦਾਅਵਾ ਹੈ ਕਿ ਉਸ ਨੇ ਗੋਸਾਵੀ ਅਤੇ ਸੈਮ ਦੀ ਗੱਲਬਾਤ ਸੁਣੀ ਸੀ। ਇਸ ਵਿਚ ਦੋਵੇਂ 25 ਕਰੋੜ ਰੁਪਏ ਦੀ ਗੱਲ ਕਰ ਰਹੇ ਸਨ। ਬਾਅਦ ਵਿਚ ਦੋਵੇਂ 18 ਕਰੋੜ 'ਤੇ ਸਹਿਮਤ ਹੋਏ। ਉਨ੍ਹਾਂ ਨੇ ਇਸ ਵਿਚੋਂ 8 ਕਰੋੜ ਸਮੀਰ ਵਾਨਖੇੜੇ ਦੇ ਦੇਣ ਦੀ ਗੱਲ ਕਹੀ।

ਗਵਾਹ ਪ੍ਰਭਾਕਰ ਨੇ ਇਹ ਵੀ ਦਾਅਵਾ ਕੀਤਾ ਕਿ ਕਰੂਜ਼ 'ਤੇ ਛਾਪੇਮਾਰੀ ਤੋਂ ਬਾਅਦ ਸੈਮ ਅਤੇ ਗੋਸਾਵੀ ਨੂੰ ਸ਼ਾਹਰੁਖ ਖਾਨ ਦੀ ਮੈਨੇਜਰ ਪੂਜਾ ਡਡਲਾਨੀ ਦੇ ਨਾਲ ਦੇਖਿਆ ਗਿਆ। ਉਨ੍ਹਾਂ 15 ਮਿੰਟ ਤੱਕ ਆਪਸ ਵਿਚ ਗੱਲਬਾਤ ਵੀ ਹੋਈ। ਪ੍ਰਭਾਕਰ ਨੇ ਦਾਅਵਾ ਕੀਤਾ ਕਿ ਗੋਸਾਵੀ ਨੇ ਉਸ ਤੋਂ ਪੰਜ ਬਣਨ ਨੂੰ ਵੀ ਕਿਹਾ ਸੀ। ਅੱਗੇ ਉਸ ਨੇ ਕਿਹਾ ਕਿ ਐੱਨ.ਸੀ.ਬੀ. ਨੇ ਉਸ ਤੋਂ 10 ਵੱਖ-ਵੱਖ ਪੰਨਿਆਂ 'ਤੇ ਹਸਤਾਖਰ ਕਰਵਾਏ ਸਨ।