ହାତବାନ୍ଧି ବସିଥିବା ପ୍ରବାସୀଙ୍କୁ ମିଳିଲା କାମ, ଖୁସିବ୍ୟକ୍ତ କଲେ ଶ୍ରମିକ

ଯାଜପୁର: ସାରା ଦେଶରେ କରୋନା ଜନିତ ଲକଡାଉନ୍ ପ୍ରଭାବରେ ଜୀବିକା ହରାଇ ନିଜ ଘରକୁ ଫେରି ଆସୁଛନ୍ତି ଲକ୍ଷ ଲକ୍ଷ ପ୍ରବାସୀ । ସଙ୍ଗରୋଧ କେନ୍ଦ୍ରରୁ ଘରକୁ ଫେରିଥିବା ପ୍ରବାସୀ ଶ୍ରମିକକୁ ପରିବାର ପ୍ରତିପୋଷଣର ଚିନ୍ତା ଘାରିଛି । ତେବେ କାମଧନ୍ଦା ହରାଇ ଅନ୍ୟ ରାଜ୍ୟରୁ ଫେରିଥିବା ପ୍ରବାସୀ ଶ୍ରମିକଙ୍କୁ ନିଜ ଅଞ୍ଚଳରେ କାମ ଯୋଗାଇ ଦେବାକୁ ନିର୍ଦ୍ଦେଶ ଦେଇଛନ୍ତି ରାଜ୍ୟ ସରକାର । ଏଥିପାଇଁ ସହଯୋଗର ହାତ ବଢାଇଛନ୍ତି ସ୍ଥାନୀୟ ପ୍ରଶାସନ । ଯାଜପୁର ଜିଲ୍ଲା ସୁକିନ୍ଦା ବ୍ଲକ୍ ବର୍ତ୍ତଣ୍ଡା ପଞ୍ଚାୟତରେ ମନରେଗା ବା ମହାତ୍ମାଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନାରେ ବ୍ଲକ୍ ପ୍ରଶାସନ ପକ୍ଷରୁ ଏମାନଙ୍କୁ ଯୋଗାଇ ଦିଆଯାଇଛି କାମ । ଯାହାକୁ ନେଇ ଖୁସି ବ୍ୟକ୍ତ କରିଛନ୍ତି ସଙ୍ଗରୋଧ କେନ୍ଦ୍ରରୁ ଫେରି କାମରେ ନିୟୋଜିତ ହୋଇଥିବା ପ୍ରବାସୀ ଶ୍ରମିକ ।