କୋରୋନା ମାରିଲା ମାନବିକତା; ମୃତଦେହକୁ ଶ୍ମଶାନ ନେବା ପାଇଁ ମିଳିଲାନି ଚାରିକାନ୍ଧ

ବ୍ରହ୍ମପୁର: କୋରୋନା ଭୟରେ ଭୁଲିଗଲେ ମାନବିକତା । ମୃତଦେହକୁ ମିଳିଲାନି ଚାରି କାନ୍ଧ । ମୃତ୍ୟୁ ପରେ ଅନ୍ତିମ ସତ୍କାର କରିବାକୁ ଆସିଲେନି ବନ୍ଧୁ ପରିଜନ, ଆତ୍ମୀୟସୌଜନ । ବାଧ୍ୟ ହୋଇ ମୃତଦେହକୁ ଘୋଷାଡି ଘୋଷାଡି ଶ୍ମଶାନକୁ ନେଲେ ଭାଇଭଉଣୀ । ଆଉ ଶେଷରେ ଜେସିବିରେ ଗାତଖୋଳି ପୋତିଲା ପ୍ରଶାସନ । ଏପରି ଏକ ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଛି ଗଞ୍ଜାମ ଜିଲ୍ଲା କବିସୂର୍ଯ୍ୟନଗରର ଗୋପିନାଥପାଟଣା ଅଞ୍ଚଳରେ । କବିସୂର୍ଯ୍ୟନଗରର ଗୋପିନାଥପାଟଣା ଅଞ୍ଚଳର ସୋମନାଥ ପାତ୍ର ଗତ 10 ଦିନ ହେବ ଜ୍ବର ଓ କାଶରେ ପୀଡିତ ଥିଲେ । ତେବେ ତାଙ୍କ ଅବସ୍ଥା ସଙ୍କଟାପନ୍ନ ହେବା ପରେ ତାଙ୍କୁ ତାଙ୍କ ସାନଭାଇ ଓ ଭଉଣୀ କବିସୂର୍ଯ୍ୟନଗର ଡାକ୍ତରଖାନାରେ ଭର୍ତ୍ତି କରିଥିଲେ । ସେଠାରେ ତାଙ୍କୁ କୋରୋନା ଲକ୍ଷଣ ଥିବା ସନ୍ଦେହରେ ଆମ୍ବୁଲାନ୍ସ ଯୋଗେ କୋଭିଡ୍‌ ହସ୍ପିଟାଲକୁ ପଠାଯାଇଥିଲା । ହେଲେ ଯିବାବାଟରେ ହିଁ ତାଙ୍କର ମୃତ୍ୟୁ ଘଟିଥିଲା ।