ସୁବର୍ଣ୍ଣପୁର: ଅନ୍ତିମ ପର୍ଯ୍ୟାୟରେ ପହଞ୍ଚିଛି ସୁବର୍ଣ୍ଣପୁର ଜିଲ୍ଲାର ଐତିହାସିକ ଶୀତଳ ଷଷ୍ଠୀ ଯାତ୍ରା । ତେବେ ଏହି ପର୍ଯ୍ୟାୟରେ ନବ ଦେବ ଦମ୍ପତି ମନ୍ଦିରକୁ ଫେରିଛନ୍ତି । ସୁବର୍ଣ୍ଣମେରୁଙ୍କ ଚଳନ୍ତି ପ୍ରତୀମା ବାବା ଚନ୍ଦ୍ରଶେଖର ମାତା ପାର୍ବତୀଙ୍କ ପାଣି ଗ୍ରହଣ କରି କନ୍ୟାପିତା ବାସଭବନରେ ଦିନେ ଅବସ୍ଥାନ କରିବା ପରେ ପ୍ରତ୍ୟାବର୍ତ୍ତନ ଶୋଭାଯାତ୍ରା ଆରମ୍ଭ ହୋଇଛି ।
ଭିଡିଓ ସୌଜନ୍ୟ: ପ୍ରତିନିଧି, ସୁବର୍ଣ୍ଣପୁର
ନବ ଦେବ ଦମ୍ପତି ଆଜି ଏକ ଆଡମ୍ବରପୂର୍ଣ୍ଣ ଶୋଭାଯାତ୍ରାରେ ନଗର ପରିକ୍ରମା କରି ରାଜରାସ୍ତାରେ ଶ୍ରଦ୍ଧାଳୁମାନଙ୍କୁ ଦର୍ଶନ ଦେଇଛନ୍ତି । ବାବା ଚନ୍ଦ୍ରଶେଖର ସହରର ଅଷ୍ଟବିଷ୍ଣୁ ଓ ଅଷ୍ଟଶମ୍ଭୁଙ୍କ ସହିତ ମାତା ପାର୍ବତୀଙ୍କୁ ଘେନି ମଧ୍ୟାହ୍ନରେ ମନ୍ଦିରକୁ ପ୍ରବେଶ କରିଛନ୍ତି । ତେବେ ରାଜୁଡା ଅମଳରୁ ମହଣ ରୂପାରେ ତିଆରି ବିମାନ,108 ଭରି ସ୍ବର୍ଣ୍ଣ ନାଗ ଓ ଦେବ ଦମ୍ପତିଙ୍କ ଅଳଙ୍କାର ଯାତ୍ରା ମୁଖ୍ୟ ଆକର୍ଷଣ ପାଲଟିଥିବା ବେଳେ ତାକୁ ଦେଖିବାକୁ ସହରରେ ଶ୍ରଦ୍ଧାଳୁଙ୍କ ବେଶ ଭିଡ ଜମିଛି ।
ସୁବର୍ଣ୍ଣପୁରରୁ ତୀର୍ଥବାସୀ ପଣ୍ଡା, ଇଟିଭି ଭାରତ
