ସମ୍ବଲପୁର: ଚାକିରୀ ଦେବା ନାମରେ ପ୍ରଥମେ ଭରସା ଜିତିଥିଲା ଅଭିଯୁକ୍ତ । ଏହାପରେ ପରସ୍ଥିତିର ସୁଯୋଗ ନେଇ ଦୁଷ୍କର୍ମ କରିବାକୁ ପଛାଇ ନଥିଲା ଅଭିଯୁକ୍ତ ଲକ୍ଷ୍ମଣ ବର୍ମା । ଏ ହେଉଛି ସ୍ଥାନୀୟ ଅଞ୍ଚଳରେ ଚାକିରୀ ଖୋଜିବାକୁ ଆସିଥିବା ଏକ ଦମ୍ପତ୍ତିଙ୍କର କଥା । ସୁନ୍ଦରଗଡ ସୀମଡେଗା ଅଞ୍ଚଳରୁ ଏହି ଦମ୍ପତ୍ତି ଚାକିରି ପାଇଁ ତାମିଲନାଡୁ ଯିବା ପାଇଁ ଆସି ସ୍ଥାନୀୟ ଅଇଁଠାପାଲି ବସ୍ଷ୍ଟାଣ୍ଡରେ ଓହ୍ଲାଇଥିଲେ । ହେଲେ ଭରସା ଜିତିଥିବା ବ୍ୟକ୍ତି ହିଁ ପରେ ମହିଳାଙ୍କ ସହ ଦୁଷ୍କର୍ମ କରିଥିବା ଅଭିଯୋଗ ଆଣିଛନ୍ତି ପୀଡିତା ମହିଳା ।
ସୂଚନା ଅନୁଯାୟୀ ତାମିଲନାଡୁ ଯିବା ସମୟରେ ସମ୍ବଲପୁର ଅଇଁଠାପାଲି ବସ୍ଷ୍ଟାଣ୍ଡରେ ଓହ୍ଲାଇଥିଲେ ଏହି ଦମ୍ପତ୍ତି । ସେଠାରେ ଚାକିରି ଦେବା ପାଇଁ କହି ଧନକାଉଡାସ୍ଥିତ ବିସ୍କୁଟ ଫ୍ୟାକ୍ଟ୍ରିକୁ ନେଇଥିଲା ଅଭିଯୁକ୍ତ ଲକ୍ଷ୍ମଣ ବର୍ମା । ସେଠାରେ କୌଶଳମତେ ଦମ୍ପତ୍ତିଙ୍କ ଭରସା ଜିତି ସେମାନଙ୍କୁ ରହିବା ପାଇଁ ସିଟି ଷ୍ଟେସନ ପାଖରେ ଏକ ଘର ଯୋଗାଇଥିଲା ଲକ୍ଷ୍ମଣ ।
ଏହି ଭରସାର ଲାଭ ଉଠାଇବାକୁ ଯାଇ ସନ୍ଧ୍ୟାରେ ଅତି ଚତୁରତାର ସହ ପ୍ରଥମେ ସ୍ବାମୀଙ୍କୁ ଅନ୍ୟତ୍ର ଛାଡିବା ପରେ ସ୍ତ୍ରୀଙ୍କୁ ନକ୍ସାପାଲିକୁ ନେଇ ଦୁଷ୍କର୍ମ କରିଥିଲା ଅଭିଯୁକ୍ତ । ପରେ ତାଙ୍କ ସ୍ବାମୀଙ୍କୁ ଆଣିବାକୁ ଯାଉଛି କହି ସମ୍ପୃକ୍ତ ସ୍ଥାନରୁ ଫେରାର ହୋଇଯାଇଥିଲା ଅଭିଯୁକ୍ତ । ଫେରିବାରେ ବିଳମ୍ବ ହେବାରୁ ଶେଷରେ ସଦର ଥାନାକୁ ଯାଇ ଏକ ମାମଲା ରୁଜୁ କରିଥିଲା ପୀଡିତା । ଯାହାକୁ ପରେ ଧନୁପାଲି ଅଞ୍ଚଳର ଥାନା ଅଧିକାରୀଙ୍କୁ ହସ୍ତାନ୍ତର କରାଯାଇଥିଲା । ଏହି ମାମଲା ଆଧାରରେ ବୁଧବାର ଅଭିଯକ୍ତ ଲକ୍ଷ୍ମଣକୁ ଗିରଫ କରିଥିଲା ପୋଲିସ ।
ଘଟଣାରେ ପୀଡିତାଙ୍କର ଡାକ୍ତରୀ ମଇନା ସହ ପୋଲିସର ତଦନ୍ତ ଜାରି ରହିଛି । ତେବେ ଗିରଫ ପରେ ଅଭିଯୁକ୍ତକୁ କୋର୍ଟ ଚାଲାଣ କରାଯିବା ନେଇ ସୂଚନା ଦେଇଛନ୍ତି ସମ୍ବଲପୁର ଏସ୍ପି ସଞ୍ଜୀବ ଅରୋରା । ଅନ୍ୟପଟେ ଏହା ଜୋରଜବରଦସ୍ତୀ ନୁହେଁ ବରଂ ମହିଳା ଜଣଙ୍କ ସହମତିରେ ହୋଇଛି ବୋଲି ସଫେଇ ଦେଇଛି ଅଭିଯୁକ୍ତ ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
