ରାୟଗଡ଼ା: ନାଗାବଳୀ ନଦୀ କୂଳରେ ଥିବା ଅଣ୍ଟାରିଗୁଡାବାସୀଙ୍କ ଚିନ୍ତା ବଢାଉଛି ବର୍ଷା । କେତେବେଳେ ଯେ ବିପଦ ଘନେଇ ଆସିବ ସେ ଭୟରେ ଦିନ କାଟୁଛନ୍ତି ଗ୍ରାମବାସୀ । ନଦୀ ପାଣି ଯେତେ ବଢିବାରେ ଲାଗୁଛି ମନରେ ଡର ସେତିକି ବଢିବାରେ ଲାଗୁଛି । ଫଳରେ ଦିନ ରାତି ପାଳି କରି ନଇ କୂଳକୁ ଅନାଇ ବସିଛନ୍ତି ଲୋକେ ।
ରାୟଗଡ଼ା ଜିଲ୍ଲାର ପୌର ପରିଷଦ ଅଧିନ 11 ନମ୍ବର ୱାର୍ଡ ହେଉଛି ଅଣ୍ଟାରିଗୁଡା ଗାଁ । 60ଟି ଆଦିବାସୀ ପରିବାରକୁ ନେଇ ଏ ଗାଁ ପାଖ ଦେଇ ବୋହି ଯାଇଛି ନାଗାବଳୀ ନଦୀ । ଯାହା ଏମାନଙ୍କ ପାଇଁ ଅଭିଶପ୍ତ ପାଲଟିଛି । ଟିକିଏ ବର୍ଷାରେ ଭୟଙ୍କର ହୋଇଉଠେ ନଦୀ । ସତେ ଯେମିତି କାଳ ଏମାନଙ୍କ ପିଛା କରୁଛି । ଦିନ ଥିଲା ଗାଁର ୨୦୦ମିଟର ଦୂରରେ ବହୁଥିଲା ନାଗାବଳୀ । ହେଲେ ଏବେ କେଇ ବର୍ଷ ହେବ ଗାଁ ମୁହାଁ ହୋଇଛି ନଦୀ ।
ଏପଟେ ପୂର୍ବ ପୁରୁଷରୁ ଚାଷବାସ କରି ରହି ଆସୁଥିବା ଏଠାକାର ବାସିନ୍ଦାଙ୍କୁ ଘାରିଛି ଭିଟାମାଟି ଚିନ୍ତା। ଦୀର୍ଘ ବର୍ଷ ଧରି ଗାଁର ସୁରକ୍ଷା ପାଇଁ ପୌର ପ୍ରଶାସନ ଠାରୁ ଆରମ୍ଭ କରି ଜିଲ୍ଲା ପ୍ରଶାସନ ତଥା ରାଜ୍ୟ ସରକାରଙ୍କ ନିକଟରେ ଗୁହାରୀ କଲେ ମଧ୍ୟ ସମାଧାନର ବାଟ ଫିଟୁନାହିଁ । ତେବେ ଏ ଦିଗରେ ଯଦି କାର୍ଯ୍ୟାନୁଷ୍ଠାନ ଗ୍ରହଣ କରାନଯାଏ, ତେବେ ନଦୀଗର୍ଭରେ ଲୀନ ହୋଇଯିବ ଗାଁ । ଅନ୍ୟପଟେ, ନଦୀବନ୍ଧ ବାନ୍ଧିବା ଜଳସେଚନ ବିଭାଗର କାର୍ଯ୍ୟ ଓ ଏହି ସମସ୍ୟାକୁ ତିନି କୋଟି ବ୍ୟୟ ଅଟକଳର ପ୍ରସ୍ତାବ ଦିଆଯାଇଥିବା କହିଛନ୍ତି ପୌର ଅଧିକାରୀ ।
ରାୟଗଡ଼ାରୁ ରଞ୍ଜନ ରଥ, ଇଟିଭି ଭାରତ
