ନବରଙ୍ଗପୁର: ତିନି ସେବାଶ୍ରମ ସ୍କୁଲ ଶିକ୍ଷକଙ୍କ ନିଲମ୍ବନ ପ୍ରତ୍ୟାହାର କରିବାକୁ ସେବାଶ୍ରମ ସ୍କୁଲ ଶିକ୍ଷକ ସଂଘ ଦାବି କରିଛି । ଦାବି ପୂରଣ ନ କଲେ ମେସ ଦାୟିତ୍ବ ଛାଡିବାକୁ ଚେତାବନୀ ଦେଇଛି ଶିକ୍ଷକ ସଂଘ । ଏହା ସହିତ ମଦ୍ୟପ କର୍ମୀଙ୍କ ସହିତ ଡାବୁଗାଁ ବିଧାୟକ ମନୋହର ରନ୍ଧାରୀ ସ୍କୁଲକୁ ଧସେଇ ପଶିବା ସହ ଶିକ୍ଷକଙ୍କୁ ଅଶ୍ଲୀଳ ଭାଷା ପ୍ରୟୋଗ କରିଥିବା ଅଭିଯୋଗ ଆଣିଛି ସେବାଶ୍ରମ ସ୍କୁଲ ଶିକ୍ଷକ ସଂଘ ।
ବିଧାୟକ ମନୋହର ରନ୍ଧାରୀ ସ୍କୁଲ ପରିଦର୍ଶନ ସମୟରେ ମଦ୍ୟପ କର୍ମୀଙ୍କୁ ସ୍କୁଲରେ ପ୍ରବେଶ କରାଇଥିବା ଓ ତିନି ଶିକ୍ଷକଙ୍କୁ ନିଲମ୍ବନ ବିରୋଧରେ ଜିଲ୍ଲାର ୮୩ଟି ସେବାଶ୍ରମ ସ୍କୁଲର ଶିକ୍ଷକ ଏକ ବୈଠକ କରିଥିଲେ । ଏହି ବୈଠକ ଡାବୁଗାଁ ସ୍ଥିତ ଏକ କଲ୍ୟାଣମଣ୍ଡପ ଠାରେ କରାଯାଇଥିଲା । ବୈଠକରେ ପାପଡାହାଣ୍ଡି ବ୍ଲକ ଧନସୁଲି ଓ ମାନିଗାଁ ସେବାଶ୍ରମ ସ୍କୁଲର ତିନିଜଣ ଶିକ୍ଷକଙ୍କ ନିଲମ୍ବନ ଆଦେଶ ପ୍ରତ୍ୟାହାର କରି ପୁନଃ ଅବସ୍ଥାପିତ କରିବା ପାଇଁ ଦାବି କରାଯାଇଥିଲା । ଏ ସମ୍ପର୍କିତ ଏକ ଦାବିପତ୍ର ମଧ୍ୟ ଜିଲ୍ଲାପ୍ରଶାସନକୁ ପ୍ରଦାନ କରାଯାଇଥିଲା ।
ଦାବିପତ୍ରରେ ଶିକ୍ଷକ ମାନଙ୍କ ପକ୍ଷରୁ ଅଭିଯୋଗ କରାଯାଇଛି ଯେ, ଗତ ସେପ୍ଟେମ୍ବର ୨୯ ତାରିଖରେ ଧନସୁଲି ଆଶ୍ରମ ବିଦ୍ୟାଳୟ ଓ ଅକ୍ଟୋବର ମାସ ୧୮ ତାରିଖରେ ମାନିଗାଁ ଆଶ୍ରମ ବିଦ୍ୟାଳୟକୁ ଉଦ୍ଦେଶ୍ୟମୂଳକ ଭାବେ ବିଧାୟକଙ୍କ ସହ ମଦ୍ୟପ ବିଜେଡି କର୍ମୀ ସ୍କୁଲକୁ ଧସେଇ ପଶିଥିଲେ । ଏପରି କି ପ୍ରବେଶ ଖାତାରେ ବିନା ଦସ୍ତଖତରେ ସ୍କୁଲରେ ପ୍ରବେଶ କରିଥିଲେ । ବଳପୂର୍ବକ ରୋଷେୟାଙ୍କ ଠାରୁ ଚଟୁ ଛଡାଇ ନେଇ ନିଜେ ବିଧାୟକ ଓ ମଦ୍ୟପ କର୍ମୀ ଖାଦ୍ୟ ପରଷିଥିଲେ । ଯାହାକି ପିଲାଙ୍କ ଖାଦ୍ୟ ଖାଇବାର ଆବଶ୍ୟକତା ଠାରୁ ଅଧିକା ଥିଲା । କେତେପିଲା ପେଟପୁରା ଖାଇବା ପରେ ବଳକା ଖାଦ୍ୟକୁ ଫିଙ୍ଗିବାକୁ ବାଧ୍ୟ ହେଇଥିଲେ । ଫଳରେ ଅନ୍ୟ ପିଲାଙ୍କୁ ଖାଦ୍ୟ ନିଅଣ୍ଟ ହୋଇଥିଲା । ଉକ୍ତ ଘଟଣାକୁ ନେଇ ବିଧାୟକ ସ୍କୁଲ ଶିକ୍ଷକଙ୍କୁ ନିନ୍ଦା କରିବା ସହ ଶିକ୍ଷକ ମାନଙ୍କୁ "ଚୋର ଶିକ୍ଷକ ଟଙ୍କା ଖାଉଛ " ବୋଲି କହି ଗାଳି ଦେଇ ଅପମାନ ଦେଇଥିଲେ । ଶିକ୍ଷକଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାପାଇଁ ଜିଲ୍ଲା ପ୍ରଶାସନକୁ ବାଧ୍ୟ କରାଯାଇଥିବା ଏହି ପତ୍ରରେ ଶିକ୍ଷକ ସଂଘ ଅଭିଯୋଗ କରିଛି ।
ଆସନ୍ତା ୨୨ ତାରିଖ ସୁଦ୍ଧା ଶିକ୍ଷକ ମାନଙ୍କ ଉପରୁ ନିଲମ୍ବନ ଆଦେଶ ପ୍ରତ୍ୟାହାର କରିବା ସହିତ ବିଧାୟକ ନିଜ କାର୍ଯ୍ୟକଳାପ ପାଇଁ କ୍ଷମା ପ୍ରାର୍ଥନା କରିବାକୁ ଶିକ୍ଷକ ସଂଘ ଦାବି କରିଛି । ଯଦି ଦାବି ପୂରଣ ନହୁଏ ଆଗାମୀ ନଭେମ୍ବର ମାସ ୧ ତାରିଖରୁ ଜିଲ୍ଲାର ଛାତ୍ରାବାସ ଓ ଛାତ୍ରୀ ନିବାସ ପରିଚାଳନା ବର୍ଜନ କରିବାକୁ ଧମକ ଦେଇଛି ସଂଘ1 । ଅନ୍ୟପଟେ ବିଧାୟକ ଏହି ଅଭିଯୋଗକୁ ଖଣ୍ଡନ କରିବା ସହ ପିଲାଙ୍କୁ ଖାଇବାକୁ ନ ଦେବା ଏକ ଦଣ୍ଡନୀୟ ଅପରାଧ ବୋଲି କହିଛନ୍ତି । ଯିଏ ଭୁଲ କରିବ ସେ ଅବଶ୍ୟ ଦଣ୍ଡ ପାଇବ ଆଉ ଯିଏ ଭଲକାମ କରିବ ସେ ପୁରସ୍କୃତ ହେବ ବୋଲି କହିଛନ୍ତି ଡାବୁଗାଁ ବିଧାୟକ ମନୋହର ରନ୍ଧାରୀ ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
