ନବରଙ୍ଗପୁର: ଶଙ୍ଖ ଛାଡି ପଦ୍ମ ଧରିଲେ ନବରଙ୍ଗପୁର ବିଜେଡି ସାଂସଦ ବଳଭଦ୍ର ମାଝୀ । ଆଜି ତାଙ୍କୁ ଜିଲ୍ଲା ବିଜେପି ପକ୍ଷରୁ ପୁଷ୍ପ ମାଲ୍ୟ ଦେଇ ବିପୁଳ ସ୍ୱାଗତ ସମ୍ବର୍ଦ୍ଧନା ଦିଆଯାଇଛି । ନବରଙ୍ଗପୁରସ୍ଥିତ ରଙ୍ଗମାଟିଗୁଡ଼ା ଶ୍ରୀ କଲ୍ୟାଣୀ ମଣ୍ଡପ ଠାରେ ସମ୍ବର୍ଦ୍ଧନା ସଭାର ଆୟୋଜନ କରାଯାଇଥିଲା । ଦଳରେ ତାଙ୍କୁ ଅଣଦେଖା କରାଯାଉଥିବାରୁ ସେ ଦଳ ଛାଡିବା ସହ ବିଜେପି ଯୋଗ ଦେଇଛନ୍ତି ।
ସେ ନିଜ ବକ୍ତବ୍ୟ କହିଛନ୍ତି କି, ମୁଁ ବିଜୁ ଜନତା ଦଳରେ ଯୋଗଦେଇ ନ ଥିଲି କିନ୍ତୁ ୨୦୧୪ ନିର୍ବାଚନରେ ବାଧ୍ୟ କରି ମୋତେ ମୁର୍ଗା ବନେଇବାକୁ ବିଜୁ ଜନତା ଦଳରେ ସାମିଲ କରିଥିଲେ। ପରେ ନିର୍ବାଚନ ଜିତିଲା ପରେ ମତେ ଭକୁଆ ବନେଇ ଖଟାଇ ଥିଲେ। ମୋତେ କୌଣସି ବିଜେଡ଼ି କାର୍ଯ୍ୟକ୍ରମରେ ଡାକୁ ନ ଥିଲେ ଓ ଅଣଦେଖା କରିବାରୁ ମୁଁ ଦଳ ଛାଡ଼ିବାକୁ ବାଧ୍ୟ ହେଲି ଓ ଭାରତୀୟ ଜନତା ପାର୍ଟିରେ ଯୋଗ ଦେଲି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅତି ଜ୍ଞାନୀ, ତେଣୁ ତାଙ୍କ ସହିତ ରହି ଦଳକୁ ସୁଦୃଢ଼ କରିବା ସହ ଦଳର ନୀତିନିୟମକୁ ନେଇ ଏହି ଅଞ୍ଚଳର ବିକାଶ ଧାରାକୁ ଆଗକୁ ବଢ଼େଇବାକୁ ଚେଷ୍ଟା କରିବି ବୋଲି ସାଂସଦ ବଳଭଦ୍ର ମାଝୀ କହିଛନ୍ତି । ଏହି ସମ୍ବର୍ଦ୍ଧନା ସଭାରେ ବହୁ କର୍ମୀମାନେ ନୂତନ ଭାବେ ଯୋଗ ଦେଇଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
