ବାରିପଦା: ଦରମା ନମିଳିବାରୁ ସଫେଇ କର୍ମଚାରୀଙ୍କ ଅଭିନବ ପ୍ରତିବାଦ । ବାରିପଦା ପୌରପରିଷଦରେ କାର୍ଯ୍ୟରତ ସଫେଇ କର୍ମଚାରୀ ସହରର ବିଭିନ୍ନ ସ୍ଥାନରୁ ଅଳିଆ ଆବର୍ଜନା ଆଣି କାର୍ଯ୍ୟାଳୟ ଭିତରେ ଫିଙ୍ଗି ପ୍ରତିବାଦ କରୁଥିବା ଘଟଣା ସାମନାକୁ ଆସିଛି ।
ବାରିପଦା ମ୍ୟୁନିସିପାଲିଟିରେ କାର୍ଯ୍ୟରତ ସଫେଇ କର୍ମଚାରୀ ଦରମା ଦାବିରେ ଗତକାଲି ଠାରୁ ଆନ୍ଦୋଳନ ଜାରି ରଖିଥିବା ବେଳେ ଆଜି ଆନ୍ଦୋଳନ ଉଗ୍ର ରୂପ ନେଇଛି । ସହର ଭିତରେ ବିଭିନ୍ନ ସ୍ଥାନରେ ଥିବା ଅଳିଆ ଭର୍ତ୍ତି ଡଷ୍ଟବିନକୁ ଆଣି ରାସ୍ତା ଉପରକୁ ଫିଙ୍ଗିଛନ୍ତି । କେବଳ ଏତିକି ନୁହେଁ ଅଳିଆ ଭର୍ତ୍ତି ଟ୍ରାକ୍ଟରକୁ ମଧ୍ୟ ଜିଲ୍ଲାପାଳଙ୍କ ଅଫିସ ସମ୍ମୁଖରେ ଫିଙ୍ଗିଦେଇଛନ୍ତି ।
ସଫେଇ ପାଇଁ ଟେଣ୍ଡର ନେଇଥିବା ଠିକା ସଂସ୍ଥା ଦରମା ଦେଉ ନଥିବାବେଳେ ଅନ୍ୟାନ୍ୟ ସରାକରୀ ସୁବିଧା ସୁଯୋଗ ଦେଉନଥିବା ଅଭିଯୋଗ କରିଛନ୍ତି ସଫେଇ କର୍ମଚାରୀ । ତେବେ ପରିସ୍ଥିତି ଉତ୍ତେଜନାପୂର୍ଣ୍ଣ ହେବାରୁ ପୋଲିସ ଘଟଣାସ୍ଥଳରେ ପହଞ୍ଚି ଆନ୍ଦୋଳନକାରୀ ସଫେଇ କର୍ମଚାରୀଙ୍କ ସହ ଆଲୋଚନା କରିଛନ୍ତି । ଆଜି ସନ୍ଧ୍ୟା ସୁଦ୍ଧା ସମ୍ପୃକ୍ତ ସଂସ୍ଥା ଦାବି ପୂରଣ ନ କଲେ ପୁଣି ଆନ୍ଦୋଳନକୁ ଓହ୍ଲାଇବେ ବୋଲି ସଫେଇ କର୍ମଚାରୀ ଚେତାବନୀ ଦେଇଛନ୍ତି ।
ମୟୁରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
