ରାଇରଙ୍ଗପୁର: ବଗିଚାରୁ ମୃତଦେହ ଉଦ୍ଧାର । ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ମୟୁରଭଞ୍ଜ ଜିଲ୍ଲା କରଞ୍ଜିଆ ଥାନା ଅନ୍ତର୍ଗତ ବଳା ଗ୍ରାମରେ ଥିବା ଏକ ବଗିଚାରେ । ମୃତକ ଜଣକ ହେଲେ ବଳା ଗାଁର ଖଗେଶ୍ବର ପଟୁଳିଆ । ଶୁକ୍ରବାର ରାତି 9ଟାରୁ ଘରରୁ ବାହାରକୁ ଯାଇ ଆଉ ଫେରିନଥିଲେ । ବିଳମ୍ବ ହେବାରୁ ପରିବାର ସଦସ୍ୟ ତାଙ୍କୁ ଖୋଜା ଖୋଜି କରିଥିଲେ । ହେଲେ ଖଗେଶ୍ବରଙ୍କ କୌଣସି ପତ୍ତା ମିଳିନଥିଲା ।
ଶନିବାର ସେହି ଗାଁର ବିପ୍ଲବ ସାହୁଙ୍କ ବଗିଚାରେ ଖଗେଶ୍ବରଙ୍କୁ ମୃତ ଅବସ୍ଥାରେ ପଡିଥିବାର ଦେଖିଥିଲେ ସ୍ଥାନୀୟ ବାସୀ । ଏନେଇ ପୋଲିସକୁ ସୂଚନା ଦେବାରୁ କରଞ୍ଜିଆ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲା । ତେବେ ମୃତଦେହ ମିଳିଥିବା ସ୍ଥାନରେ ପୂର୍ବରୁ ବେଆଇନ ମଦ ବ୍ୟାପାର ଚାଲୁଥିବା ନେଇ ବାରମ୍ବାର ପ୍ରଶାସନ ନିକଟରେ ଗ୍ରାମବାସୀ ଅଭିଯୋଗ କରିଥିଲେ । କିନ୍ତ ପ୍ରଶାସନ ତରଫରୁ କୌଣସି ପ୍ରକାର କାର୍ଯ୍ୟାନୁଷ୍ଠାନ ନିଆ ଯାଉନଥିବାର ସାଂଘାତିକ ଅଭିଯୋଗ ଆଣିଛନ୍ତି ଗ୍ରାମବାସୀ ।
ସେପଟେ ସମ୍ପୃକ୍ତ ବଗିଚା ମାଲିକ ନଆସିବା ପର୍ଯ୍ୟନ୍ତ ମୃତଦେହ ଉଠାଇବାକୁ ଦେବୁ ନାହି ବୋଲି ଗ୍ରାମବାସୀ ଜିଦ ଧରିଥିଲେ । ଅନ୍ୟପଟେ ସମୁଦାୟ ଘଟଣା ନେଇ ବର୍ତ୍ତମାନ ସୁଦ୍ଧା ପୋଲିସ କୌଣସି ପ୍ରକାର ପ୍ରତିକ୍ରିୟା ଦେବାକୁ ମନାକରିଛି । ମୃତକଙ୍କ କାନରୁ ରକ୍ତ ବାହାରୁ ଥିବା ଦେଖି କେହି ଦୁର୍ବୃତ୍ତ ତାଙ୍କୁ ପ୍ରବଳ ମାଡ଼ ମାରିଥିବା ପୋଲିସ ଅନୁମାନ କରୁଛି । ଏନେଇ କରଞ୍ଜିଆ ପୋଲିସ ଏକ ହତ୍ୟା ମାମଲା ରୁଜୁ କରି ତଦନ୍ତ ଜାରି ରଖିବା ସହିତ ମୃତ ଦେହକୁ ଜବତ କରି ବ୍ୟବଚ୍ଛେଦ ପାଇଁ କରଞ୍ଜିଆ ଡ଼ାକ୍ତରଖାନାକୁ ପଠାଇଛି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
