କୋରାପୁଟ: ଆଦିବାସୀ ସମ୍ପ୍ରଦାୟର ଭିନ୍ନ ପରମ୍ପରା। ଚୈତ୍ର ପର୍ବର ସମାପ୍ତିର ଶେଷରେ ବିହନ ଧରା ଉତ୍ସବ ପାଳନ କରାଯାଇଛି। ବୁଧବାର ଠାରୁ କୋରାପୁଟ ଜିଲ୍ଲାରେ ଏହି ଆଦିବାସୀ ଚାଷୀ ପାହାଡ଼ ଡଙ୍ଗରରେ ବିଶେଷ କରି ମାଣ୍ଡିଆ ବିହନ ବୁଣି ନିଜ ପରମ୍ପରାକୁ ବଜାୟ ରଖିଛନ୍ତି ।
ଜିଲ୍ଲାର କୋରାପୁଟ,ପଟ୍ଟାଙ୍ଗି , ଲମତାପୁଟ ପ୍ରଭୃତି ଅଞ୍ଚଳରେ ଅନେକ ଆଦିବାସୀ ପରିବାର ଚୈତ୍ର ପର୍ବ ଆରମ୍ଭ କରିବା ହେଉ ବା ବେଣ୍ଟକୁ ଯିବା କାର୍ଯ୍ୟର ଶୁଭାରମ୍ଭ କରିଥିବା ବେଳେ ଦଶମନ୍ତପୁର ବ୍ଲକ ସହ କୋରାପୁଟ , ନବରଙ୍ଗପୁର ଓ ରାୟଗଡା ଜିଲ୍ଲାର ସଂଧିସ୍ଥଳରେ ଥିବା କୁଲାଟି ଗ୍ରାମରେ ଏହି ଚୈତ୍ର ପର୍ବର ଶେଷଦିନ ପାଳିତ ହେବା ସହ ବିହନ ଧରା ଉତ୍ସବ ପାଳନ କରାଯାଇଛି ।
ତେବେ ବୁଣିବା ପୂର୍ବରୁ ଗାଁ ଦିଶାରୀ ଗ୍ରାମଦେବୀଙ୍କୁ ନିଶାଣୀ ମୁଣ୍ଡା ଠାରେ ପୂଜାର୍ଚ୍ଚନା କରି ଗାଁର ମହିଳା ଆଣିଥିବା ଧାନକୁ ସ୍ପର୍ଶ କରି ପୁଣିଥରେ ତାଙ୍କରି ହାତରେ ଢାଳି ଦିଅନ୍ତି । ଦିଶାରୀଙ୍କ ହାତର ସ୍ପର୍ଶ ପାଇଥିବା ଏହି ବିହନକୁ ଘରେ ସାଇତି ରଖିଥିବା ବିହନ ସହ ମିଶା ଯାଇ ଡଙ୍ଗର ପାହାଡରେ ବୁଣିବା ଆରମ୍ଭ କରିଥାନ୍ତି ଗ୍ରାମବାସୀ । ଦିଶାରୀ ସ୍ପର୍ଶ କରିଥିବା ବିହନ ବୁଣିଲେ ଚାଷବାସ ଭଲ ହୁଏ ବୋଲି ଲୋକଙ୍କ ମନରେ ବିଶ୍ବାସ ରହିଛି ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
