କୋରାପୁଟ: ପରଲୋକରେ କେନ୍ଦ୍ରୀୟ ବିଶ୍ବବିଦ୍ୟାଳୟ କୋରାପୁଟର କୁଳପତି ଆଇ ରାମବ୍ରହ୍ମମ । ସେ ବିଶ୍ବବିଦ୍ୟାଳୟର ତୃତୀୟ କୁଳପତି ଭାବେ ନିଯୁକ୍ତ ଥିଲେ । ତାଙ୍କ ବିୟୋଗରେ ସିୟୁଓର ଅଧ୍ୟାପକ, ଅଧ୍ୟାପିକା ଏବଂ ଛାତ୍ରଛାତ୍ରୀଙ୍କ ମହଲରେ ଶୋକର ଛାୟା ଖେଳିଯାଇଛି ।
କେନ୍ଦ୍ରୀୟ ବିଶ୍ଵବିଦ୍ୟାଳୟର କୁଳପତିଙ୍କ ଦେହାନ୍ତ । ଆଜି ସନ୍ଧ୍ୟାରେ କୋରାପୁଟ ଜିଲ୍ଲାର ସୁନାବେଡାରେ ଥିବା କେନ୍ଦ୍ରୀୟ ବିଶ୍ଵବିଦ୍ୟାଳୟର କୁଳପତି ଆଇ॰ ରାମବ୍ରହ୍ମମଙ୍କ 67 ବର୍ଷ ବୟସରେ ଦେହାନ୍ତ ହୋଇଯାଇଛି । ସେ କୋଭିଡରୁ ସୁସ୍ଥହେବା ପରେ କର୍କଟ ରୋଗରେ ଆକ୍ରାନ୍ତ ହୋଇ ହାଇଦ୍ରାବାଦର ଏକ ଘରୋଇ ଚିକିତ୍ସାଳୟରେ ଚିକିତ୍ସିତ ହେଉଥିଲେ । ଏନେଇ ବିଶ୍ୱବିଦ୍ୟାଳୟ ତରଫରୁ ଏକ ପ୍ରେସ ବିବୃତିରେ ସୂଚନା ପ୍ରଦାନ କରାଯାଇଛି । ଆଜି ସେ ମୃତ୍ୟୁବରଣ କରିବା ସମୟରେ ତାଙ୍କ ପାଖରେ ତାଙ୍କ ଧର୍ମପତ୍ନୀ ଲକ୍ଷ୍ମୀ ରାମବ୍ରହ୍ମମ ଉପସ୍ଥିତ ଥିଲେ ।
ପ୍ରଫେସର ରାମବ୍ରହ୍ମମ 2019 ମସିହାର ଡିସେମ୍ବରରେ କେନ୍ଦ୍ରୀୟ ବିଶ୍ବବିଦ୍ୟାଳୟ ଓଡିଶା କୋରାପୁଟରେ କୁଳପତି ଭାବେ ଯୋଗ ଦେଇଥିଲେ । ଅତି ଅଳ୍ପ ସମୟରେ ବହୁଦିନରୁ ଶିଥିଳ ହୋଇପଡିଥିବା ବିଭିନ୍ନ ଉନ୍ନତିମୂଳକ କାର୍ଯ୍ୟକୁ ହାତକୁ ନେଇ ସୁନାମ ଅର୍ଜନ କରିଥିଲେ । କୋଭିଡ ସମୟରେ ବିଶ୍ୱବିଦ୍ୟାଳୟର ଛାତ୍ରଛାତ୍ରୀଙ୍କୁ ଅନଲାଇନରେ ପରୀକ୍ଷା ଦେବାର ସୁଯୋଗ ଦେଇ ସେମାନଙ୍କ ଘରକୁ ଯାଇ ସେମାନଙ୍କ ମନୋବଳ ବଢାଇବା ସେ ସମୟରେ ଚର୍ଚ୍ଚାର ବିଷୟ ପାଲଟିଥିଲା । ସମସ୍ତଙ୍କୁ ସାଥିରେ ନେଇ କାର୍ଯ୍ୟ କରିବା ଓ ବିଶେଷ କରି ବିଶ୍ବବିଦ୍ୟାଳୟକୁ କୋରାପୁଟର ଗିରିକନ୍ଦରରେ ଅନେକ ବାଧାବିଘ୍ନ ଦେଇ ଅଧ୍ୟୟନ କରୁଥିବା ଆଦିବାସୀ ଓ ଅଣ ଆଦିବାସୀ ଛାତ୍ରଛାତ୍ରୀଙ୍କ ପାଇଁ ସର୍ବୋତ୍କୃଷ୍ଟ ଅନୁଷ୍ଠାନ କରି ଗଢିତୋଳିବା ପାଇଁ ତାଙ୍କର ପ୍ରୟାସ ଅତୁଳନୀୟ ବୋଲି ବୁଦ୍ଧିଜୀବୀ ମତବ୍ୟକ୍ତ କରିଛନ୍ତି ।
ଆଜି ତାଙ୍କ ବିୟୋଗର ଖବର ଶୁଣିବା ମାତ୍ରେ ତାଙ୍କ ଆମର ଆତ୍ମାର ସଦଗତି ନିମନ୍ତେ ବିଶ୍ବବିଦ୍ୟାଳୟରେ ଭାରପ୍ରାପ୍ତ କୁଳପତି ପ୍ରଫେସର ଶରତ କୁମାର ପାଲିତଙ୍କ ଅଧ୍ୟକ୍ଷତାରେ ଏକ ଶୋକସଭା ଆୟୋଜିତ ହୋଇଯାଇଛି ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
