ଖୋର୍ଦ୍ଧା: ବାଇଚଢେଇ । ବାସ୍ ନାଁ ଶୁଣି ଦେଲେ ହିଁ ମନରେ ଭରି ଯାଏ ଅସୁମାରୀ ଆନନ୍ଦ । ବାଇ ଚଢେଇକୁ ନେଇ ରହିଛି ଅନେକ କାହାଣୀ । ଗପ, ଗୀତ, କାହାଣୀ ସବୁଠି ସ୍ଥାନ ପାଇଛି ପ୍ରକୃତିର ଏହି କୁନି ଚଢେଇ । ହେଲେ ପ୍ରକୃତିର ଶୋଭା ମଣ୍ଡନ କରୁଥିବା ବାଇଚଢେଇ ଏବେ ଧିରେ ଧିରେ ଲୋପ ପାଇବାକୁ ବସିଲେଣି ।
ବାଇଚଢେଇ କାହିଁ କେଉଁ କାଳରୁ ଆମ ସଂସ୍କୃତି ତଥା ଲୋକସାହିତ୍ୟ ସହିତ ଜଡିତ । ଦିନଥିଲା ବାଇ ଚଢେଇଙ୍କ କିଚିରି ମିଚିରି ଶଦ୍ଦରେ ପ୍ରକମ୍ପିତ ହେଉଥିଲା ସମଗ୍ର ପରିବେଶ । ହେଲେ ସମୟର ଗତିଚକ୍ରରେ ଧୀରେ ଧୀରେ ବିଲୁପ୍ତ ହେବାକୁ ବସିଲାଣି ଏହି ଚଢେଇ । ଶୁଭୁନି ଆଉ ସେମାନଙ୍କ କିଚିରି ମିଚିରି ଶଦ୍ଦ । ହେଲେ ଖୋର୍ଦ୍ଧା ଜିଲା ବୋଲଗଡ ବ୍ଳକର ବିଭିନ୍ନ ସ୍ଥାନରେ ଦେଖିବାକୁ ମିଳିଛି ଏହି ବିଲୁପ୍ତ ପକ୍ଷୀ ବାଇଚଢେଇ ଏବଂ ସେମାନଙ୍କ ଆକର୍ଷଣୀୟ ମନଲୋଭା ବସା ।
ବାଇଚଢେଇ ବସା ହିଁ ତାହାର ପରିଚୟ ସୃଷ୍ଟି କରେ । ସାଧାରଣତଃ ବର୍ଷା ଦିନେ ବାଇଚଢେଇ ବଡ ବଡ ଗଛରେ ବସାବାନ୍ଧିବାକୁ ଭଲ ପାଏ । ଝଡି ବର୍ଷା ବି କିଛି ବି କ୍ଷତି କରିପାରିନେ ତାର ବସାକୁ । ଆଉ ପୂର୍ବରୁ ଲୋକେ ବାଇ ଚଢେଇ ରାବରୁ ହିଁ ପ୍ରାକୃତିକ ବିପର୍ଯ୍ୟୟର ପ୍ରାକ୍ ସୂଚନା ପାଇ ପାରୁଥିଲେ । ତେଣୁ ଲୋକେ ସତର୍କ ରହୁଥିଲେ ବୋଲି ଲୋକମତ ରହିଛି । ସେହିପରି ରୋଗ ପୋକକୁ ମଧ୍ୟ ଦମନ କରିଥାଏ ଏହି କୁନି ଚଢେଇ । ତେଣୁ ଏହାକୁ କୃଷକର ବନ୍ଧୁ ବୋଲି ମଧ୍ୟ କୁହାଯାଏ ।
ହେଲେ ଏହି ବିଚିତ୍ର ବିନ୍ଧାଣୀ ଏବେ ବିଲୁପ୍ତ ପ୍ରାୟ । ଏମାନଙ୍କ ସୁରକ୍ଷା ପାଇଁ କୌଣସି ସ୍ତରରେ ଉଦ୍ୟମ କରାଯାଉନାହିଁ । ଯାହା ଆଗାମୀ ପିଢୀ ଓ ପରିବେଶ ପାଇଁ ବେଶ୍ କ୍ଷତିକାରକ । ବାଇଚଢେଇଙ୍କ ବଂଶବିସ୍ତାର ଓ ସେମାନଙ୍କ ସୁରକ୍ଷା ପାଇଁ ବେଳ ହୁଁ ସାବଧାନ ନ ହେଲେ ଆଗକୁ କେବଳ କାହାଣୀ ହୋଇ ରହିଯିବେ ଏହି ପ୍ରକୃତି ବନ୍ଧୁ ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
