କେନ୍ଦ୍ରାପଡ଼ା: ମୋ ସ୍କୁଲ ଅଧ୍ୟକ୍ଷା ସୁସ୍ମିତା ବାଗଚିଙ୍କ କେନ୍ଦ୍ରାପଡା ଗସ୍ତ । ବିଭିନ୍ନ ବିଦ୍ୟାଳୟ ପରିଦର୍ଶନ କରିବା ସହ ସ୍କୁଲର ଭିତ୍ତିଭୂମି, ମଧ୍ୟାହ୍ନ ଭୋଜନର ମାନ ଏବଂ ବିଦ୍ୟାଳୟର ବିକାଶ ନେଇ ତଦାରଖ କରିଥିଲେ l ଅଧ୍ୟକ୍ଷା ବଲୁରିଆ ସ୍କୁଲରେ ଛାତ୍ରଛାତ୍ରୀଙ୍କ ସହ ବସି ମଧ୍ୟାହ୍ନ ଭୋଜନ ମଧ୍ୟ ଖାଇଥିଲେ । ପରେ ଜିଲାପାଳଙ୍କ ସମ୍ମିଳନୀ କକ୍ଷରେ ଆୟୋଜିତ ଏକ ସମୀକ୍ଷା ବୈଠକରେ ଜିଲାର ଶିକ୍ଷକ ଓ ଛାତ୍ରଛାତ୍ରୀଙ୍କ ସହ ଏନେଇ ଆଲୋଚନା କରିଥିଲେ।
ରାଜନଗର ବ୍ଲକ ପେଣ୍ଠ ପ୍ରକଳ୍ପ ପ୍ରାଇମେରୀ ସ୍କୁଲର ଛାତ୍ରୀ ଶୁଭସ୍ମିତା ତ୍ରିପାଠୀଙ୍କୁ ଅଧ୍ୟକ୍ଷା ବାଗଚି ସମ୍ବର୍ଦ୍ଧିତ କରିଥିଲେ । ଏଠାରେ ସୂଚନାଯୋଗ୍ୟ ଶୁଭସ୍ମିତା ସ୍ଥାନୀୟ ଅଞ୍ଚଳରେ ଅଧାରୁ ସ୍କୁଲ ଛାଡୁଥିବା ଛାତ୍ରଛାତ୍ରୀଙ୍କୁ ଏବଂ ସେମାନଙ୍କର ଅଭିଭାବକଙ୍କୁ ବୁଝାଇସୁଝାଇ ସ୍କୁଲକୁ ପୁନର୍ବାର ଫେରାଇ ଆଣିବା ଦିଗରେ କାମ କରୁଛନ୍ତି। ଏପରି କାର୍ଯ୍ୟରେ ସଫଳ ହୋଇ ବିଶ୍ବସ୍ତରୀୟ କିଡ୍ସ ପିସ ଆୱାର୍ଡ ଦୌଡ଼ରେ ରହିଥିଲେ ଶୁଭସ୍ମିତା।
ଏହି ସମ୍ବର୍ଦ୍ଧନା ସମୟରେ ପେଣ୍ଠ ସ୍କୁଲରେ ପାନୀୟ ଜଳଯୋଗାଣ, ଡେସ୍କବେଞ୍ଚ, ଲାଇବ୍ରେରୀରେ ବିଦ୍ୟୁତ ଯୋଗାଣ ପାଇଁ ଶୁଭସ୍ମିତା ଅନୁରୋଧ କରିଥିଲେ। ଶୁଭସ୍ମିତାଙ୍କ ଅନୁରୋଧ ପରେ ପାନୀୟ ଜଳ ସମସ୍ୟାର ସମାଧାନ ନିମନ୍ତେ ଅଧ୍ୟକ୍ଷା ତତକ୍ଷଣାତ 1ଲକ୍ଷ ଟଙ୍କାର ଚେକ ବିଦ୍ୟାଳୟର ପ୍ରଧାନଶିକ୍ଷକଙ୍କୁ ପ୍ରଦାନ କରିଥିଲେ। ସେହିପରି ଅନ୍ୟାନ୍ୟ ସମସ୍ୟାର ସମାଧାନ ଖୁବଶୀଘ୍ର କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି ‘ମୋ ସ୍କୁଲ’ ଅଧ୍ୟକ୍ଷା।
କେନ୍ଦ୍ରାପଡ଼ାରୁ ରାଧାକାନ୍ତ ମହାନ୍ତି, ଇଟିଭି ଭାରତ
