ଯାଜପୁର: ରାଜ୍ୟର ବିଭିନ୍ନ ଶୈବପୀଠରେ ବେଶ୍ ଧୁମ୍ଧାମରେ ଚାଲିଛି ଜାଗର । ଚଣ୍ଡିଖୋଲସ୍ଥିତ ପ୍ରସିଦ୍ଧ ଶୈବପୀଠ ମହାବିନାୟକରେ ମଧ୍ୟ ଆଡମ୍ବର ସହ ପାଳିତ ହେଉଛି ମହାଶିବରାତ୍ରୀ । ଦିଅଁ ଦର୍ଶନ ପାଇଁ ମନ୍ଦିରରେ ଭୋରୁ ଲାଗିଛି ଶ୍ରଦ୍ଧାଳୁଙ୍କ ଭିଡ । ଅନ୍ୟପଟେ ସମସ୍ତ ନୀତିକାନ୍ତି ସୁରୁଖୁରୁରେ ସମ୍ପାଦନ ହେବା ସହ ସୁରୁଖୁରରେ ଦର୍ଶନକୁ ନଜରରେ ରଖି ମନ୍ଦିର ତରଫରୁ ଗ୍ରହଣ କରାଯାଇଛି ବ୍ୟାପକ ସୁରକ୍ଷା ବ୍ୟବସ୍ଥା ।
ନିର୍ଜଳ ଓ ନିରାହାର ହୋଇ ମହାଦୀପ ଉଠିବା ସମୟକୁ ଅପେକ୍ଷା କରି ରହିଛନ୍ତି ସମସ୍ତ ବ୍ରତଧାରୀ । ତେବେ ମହାବିନାୟକ ମନ୍ଦିରରେ ମଧ୍ୟ ମହାଦୀପ ଉଠିବାର କାର୍ଯ୍ୟକ୍ରମ ଥିବାରୁ ହାତରେ ଦୀପ ଧରି ସନ୍ଧ୍ୟାରୁ ଜମିଛି ଶ୍ରଦ୍ଧାଳୁଙ୍କ ଭିଡ । ପ୍ରକାଶ ଯେ ଜଙ୍ଗଲ ଓ ପାହାଡ ଘେରା ମହାବିନାୟକ ମନ୍ଦିରରେ ସାମୂହିକ ଭାବେ ପୂଜା ପାଆନ୍ତି ଗଣେଷ, ନାରାୟଣ, ଶିବ, ଅମ୍ବିକା ଏବଂ ଭାସ୍କର । ଯାହାକି ସମଗ୍ର ରାଜ୍ୟରେ ଏକ ବିରଳ ପରମ୍ପରା ।
ବିଶ୍ବାସ ରହିଛି ଜାଗରରେ ମହାବିନାୟକଙ୍କୁ ଦର୍ଶନ କଲେ ପୂଣ୍ୟ ପ୍ରାପ୍ତି ହେବା ସହ ମନସ୍କାମନା ପୂର୍ଣ୍ଣ ହୁଏ । ତେଣୁ ପ୍ରତିବର୍ଷ ମହାଶିବରାତ୍ରୀରେ ଏଠାକୁ ଛୁଟେ ଭକ୍ତଙ୍କ ସୁଅ । ତେବେ ସକାଳୁ ମହାପ୍ରଭୁଙ୍କ ସ୍ବତନ୍ତ୍ର ନୀତିକାନ୍ତିରେ ପୂଜାର୍ଚ୍ଚନା ସରିଥିବା ବେଳେ ବର୍ତ୍ତମାନ ମହାଦୀପ ଉଠିବା ନେଇ ପ୍ରସ୍ତୁତି ଚାଲିଛି ।
କେବଳ ମହାବିନାୟକ ଶୈବ ପୀଠ ନୁହେଁ ବରଂ ଜିଲ୍ଲା ସଦର ମହକୁମାସ୍ଥିତ ତ୍ରିଲୋଚନେଶ୍ବର, ଧର୍ମଶାଳାର ଗୋକର୍ଣ୍ଣେଶ୍ବର, ବିଂଝାରପୁରର ବରୁଣେଶ୍ବର, ଦଶରଥପୁରର ସିଦ୍ଧେଶ୍ବର, ଗଣେଶ୍ବରପୁରର ବେଲେଶ୍ବର, ଷଠିପୁରର ଲିଙ୍ଗେଶ୍ବର, ବ୍ୟାସନଗରର ସ୍ବପ୍ନେଶ୍ବର, କୁଆଖିଆର ଚନ୍ଦନେଶ୍ବର ଓ ସାରଙ୍ଗପୁରର ଜଗତେଶ୍ବର ପ୍ରଭୃତି ମନ୍ଦିରରେ ମହାଶିବରାତ୍ରୀ ପାଇଁ ମହାଦୀପ ଉଠିବାର କାର୍ଯ୍ୟକ୍ରମ ରହିଛି । ଏନେଇ ସମସ୍ତ ପୀଠରେ ଭକ୍ତଙ୍କ ସମାଗମ ଦେଖିବାକୁ ମିଳିଛି ।
ଯାଜପୁରରୁ ଜ୍ଞାନ ରଞ୍ଜନ ଓଝା, ଇଟିଭି ଭାରତ
