ଯାଜପୁର: ଭିସା ଷ୍ଟିଲ କଳକାରଖାନାରୁ ଟ୍ରକ୍ ଯୋଗେ ମାଲ୍ ପରିବହନକୁ ନେଇ ମୁଣ୍ଡ ଟେକିଛି ବିବାଦ । ଯାଜପୁର କଳିଙ୍ଗନଗର ଶିଳ୍ପାଞ୍ଚଳରେ ଥିବା ଏହି କାରଖାନାରେ ଫାଷ୍ଟ କମ୍ ଫାଷ୍ଟ ଲୋଡ୍ ନିୟମ ସଠିକ୍ ଭାବେ କାର୍ଯ୍ୟକାରୀ ହେଉନଥିବାରୁ ଅସନ୍ତୋଷ ବ୍ୟକ୍ତ କରିଛନ୍ତି ଟ୍ରକ ମାଲିକ । ଏନେଇ ଗତକାଲି କଳିଙ୍ଗନଗରରେ ସ୍ଥାନୀୟ ଅଞ୍ଚଳର ଶତାଧିକ ଟ୍ରକ୍ ମାଲିକ ଏକତ୍ରିତ ହୋଇ ଏହାର ଦୃଢ ପ୍ରତିବାଦ କରିବା ସହ ଫାଷ୍ଟ କମ୍ ଫାଷ୍ଟ ଲୋଡ୍ ନିୟମକୁ ସଠିକ୍ ଭାବେ ଲାଗୁ କରିବାକୁ ଦାବି କରିଛନ୍ତି । ଏଥିରେ ବ୍ୟତିକ୍ରମ ହେଲେ ଆଗକୁ ଆନ୍ଦୋଳନକୁ ଜୋରଦାର କରାଯିବ ବୋଲି ଟ୍ରକ୍ ମାଲିକ ଚେତାବନୀ ଦେଇଛନ୍ତି ।
ମିଳିଥିବା ସୂଚନା ମୁତାବକ ପୂର୍ବରୁ ଏହି କାରଖାନାରେ ମାଲ୍ ପରିବହନକୁ ନେଇ ବିବାଦ ଦେଖାଦେଇଥିଲା । ଫାଷ୍ଟ କମ୍ ଫାଷ୍ଟ ଲୋଡ୍ ନିୟମ ଲାଗୁ କରିବାକୁ ଦାବି କରି ଟ୍ରକ୍ ମାଲିକମାନେ ହାଇକୋର୍ଟ ଦ୍ବାରସ୍ଥ ହୋଇଥିଲେ । ପରେ କାରଖାନାରେଏହି ନିୟମ ଲାଗୁ କରିବାକୁ ଅଦାଲତ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦେଇଥିଲେ । ହେଲେ ବର୍ତ୍ତମାନ ଏଥିରେ ବ୍ୟତିକ୍ରମ ଦେଖାଦେଇଥିବା ଅଭିଯୋଗ ହୋଇଛି । ରାଜନୈତିକ ଉଦ୍ଦେଶ୍ୟ ରଖି କିଛି ମୁଷ୍ଟିମେୟ ଲୋକ ଏହି ନିୟମକୁ ଖୋଲାଖୋଲି ଉଲଙ୍ଘନ କରୁଛନ୍ତି । ପାତରଅନ୍ତର କରାଯାଇ ମନଇଚ୍ଛା ଗାଡ଼ି ଲୋଡିଂ ଦିଆଯାଉଛି । ଫଳରେ ମାଲ୍ ପରିବହନ ପାଇଁ ସ୍ଥାନୀୟ ଅଞ୍ଚଳର ଟ୍ରକ୍ ମାଲିକମାନେ ସୁଯୋଗ ପାଉନଥିବା ବେଳେ ନାନା ସମସ୍ୟାର ସମ୍ମୁଖୀନ ହେଉଛନ୍ତି ।
ଏନେଇ ପ୍ରଶାସନ ନିକଟରେ ବାରମ୍ବାର ଅଭିଯୋଗ କରାଯାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ । ତେଣୁ ଏନେଇ ଟ୍ରକ୍ ମାଲିକଙ୍କ ମଧ୍ୟରେ ତିବ୍ର ଅସନ୍ତୋଷ ପ୍ରକାଶ ପାଇଛି । ଏନେଇ ଗତକାଲି ଟ୍ରକ୍ ମାଲିକମାନେ ଏହାର ଦୃଢ ପ୍ରତିବାଦ କରି ଫାଷ୍ଟ କମ୍ ଫାଷ୍ଟ ଲୋଡ୍ ନିୟମକୁ ସଠିକ୍ ଭାବେ ଲାଗୁ କରିବାକୁ ଦାବି କରିଥିଲେ । ସେପଟେ ଶତାଧିକ ଟ୍ରକ୍ ମାଲିକ ଏକତ୍ରିତ ହୋଇଥିବାରୁ କୌଣସି ଅପ୍ରୀତିକର ପରିସ୍ଥିତିକୁ ଏଡାଇବା ପାଇଁ ଭିସା କାରଖାନା ସମ୍ମୁଖରେ ବ୍ୟାପକ ପୋଲିସ ମୁତୟନ କରାଯାଇଥିଲା।
ଯାଜପୁରରୁ ଜ୍ଞାନରଞ୍ଜନ ଓଝା, ଇଟିଭି ଭାରତ
