ଦେବଗଡ: ଜିଲ୍ଲାରେ କୋରୋନା ସଂକ୍ରମଣ ସମ୍ପୂର୍ଣ୍ଣ ନିୟନ୍ତ୍ରଣରେ ରହିଛି । କେବଳ 5ଟି ସକ୍ରିୟ କେସ ରହିଛି । ବାକି ସମସ୍ତେ ସୁସ୍ଥ ହୋଇସାରିଥିବା ଜଣାପଡିଛି । ଏନେଇ ଆଶ୍ବସ୍ତି ପ୍ରକାଶ କରିଛନ୍ତି ଜିଲ୍ଲାବାସୀ ।
ସାରା ରାଜ୍ୟରେ କୋରୋନା ଆକ୍ରାନ୍ତଙ୍କ ସଂଖ୍ୟା ଉଦବେଗଜନକ ଭାବେ ବୃଦ୍ଧି ପାଇବାରେ ଲାଗିଛି । ଦେବଗଡରେ ଶୁକ୍ରବାର 4 ଜଣ କୋରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏମାନଙ୍କ ମଧ୍ୟରୁ ଜଣେ କେଲଡା କ୍ବାରେଣ୍ଟାଇନ ସେଣ୍ଟରର ହୋଇଥିବା ସୂଚନା ରହିଛି । ସେ ତାମିଲନାଡୁ ଫେରନ୍ତା ବୋଲି ଜଣାପଡିଛି ।
ସେହିପରି ଅନ୍ୟ ତିନି ଜଣ ବାରକୋଟ ବ୍ଲକ ବମ୍ପରଡାସ୍ଥିତ ଚତୁର୍ଥ ବାଟାଲିୟନର ଯବାନ । ସେମାନେ ଗଞ୍ଜାମକୁ ଡ୍ୟୁଟିରେ ଯାଇ ଫେରିଥିବା ସ୍ବାସ୍ଥ୍ୟ ବିଭାଗ ସୂତ୍ରରୁ ଜଣାପଡିଛି ।
ଏବେ ସୁଦ୍ଧା ଜିଲ୍ଲାରେ ମୋଟ 66 ଜଣ କୋରୋନା ପଜିଟିଭ ବାହାରିଛନ୍ତି । ସେଥିମଧ୍ୟରୁ 61 ଜଣ ସୁସ୍ଥ ହୋଇ କୋଭିଡ ହସ୍ପିଟାଲରୁ ଘରକୁ ଫେରିଛନ୍ତି । କେବଳ 5 ଜଣ ଚିକିତ୍ସିତ ହେଉଥିବା ସୂଚନା ରହିଛି ।
ଦେବଗଡରୁ ସରୋଜ ଶତପଥୀ, ଇଟିଭି ଭାରତ
