ଭୁବନେଶ୍ବର: ବିଜେପୁର ଛାଡ଼ିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏନେଇ ଆଜି ବାଚସ୍ପତିଙ୍କୁ ଇସ୍ତଫା ପତ୍ର ଦେଇଛନ୍ତି ନବୀନ । ବିଜେପୁରବାସୀଙ୍କୁ ଧନ୍ୟବାଦ ଦେବା ସହିତ କୃତଜ୍ଞତା ଜ୍ଞାପନ କରିଛନ୍ତି ସେ ।
ମିଳିଥିବା ସୂଚନା ମୁତାବକ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ 2019 ସାଧାରଣ ନିର୍ବାଚନରେ ଉଭୟ ହିଞ୍ଜିଳି ଓ ବିଜେପୁର ଆସନରୁ ଲଢିଥିଲେ । ତେବେ ଉଭୟ ଆସନରୁ ସେ ବିପୁଳ ଜନସମର୍ଥନ ପାଇ ବିଜୟ ଲାଭ କରିଥିଲେ । ନିୟମ ଅନୁଯାୟୀ ବିଜୟୀ ଦଳ ସରକାର ଗଢିବା ପରେ ଯଦି କୌଣସି ବିଧାୟକ ଦୁଇଟି ଆସନରୁ ଛିଡ଼ା ହୋଇଥାନ୍ତି, ତେବେ ସେ ଗୋଟିଏ ଆସନରୁ ସରକାର ଗଠନ ହେବାର 14 ଦିନ ଭିତରେ ରାଜ୍ୟପାଳଙ୍କୁ ନିଜର ଇସ୍ତଫା ପ୍ରଦାନ କରିବେ । ଏହି ଆଧାରରେ ନବୀନ ଆଜି ବିଜେପୁର ଆସନରୁ ନିଜର ଇସ୍ତଫା ପ୍ରଦାନ କରିଛନ୍ତି ।
ସୂଚନାଯୋଗ୍ୟ ସାଧାରଣ ନିର୍ବାଚନରେ ନବୀନ ପଟ୍ଟନାୟକ ହିଞ୍ଜିଳି ଓ ବିଜେପୁରରୁ ନିର୍ବାଚନ ଲଢିଥିଲେ । ହିଞ୍ଜିଳିରୁ 60 ହଜାରରୁ ଅଧିକ ଭୋଟରେ ଜିତିଥିବା ବେଳେ ବିଜେପୁରରୁ 54 ହଜାରରୁ ଅଧିକ ଭୋଟ ବ୍ୟବଧାନରେ ବିଜୟୀ ଲାଭ କରିଥିଲେ । ତେବେ ବିଜେପୁର ଆସନ ପାଇଁ ଉପ ନିର୍ବାଚନ ହେବା ନେଇ ସୂଚନା ମିଳିଛି ।
ଭୁବନେଶ୍ବରରୁ ଅଜିତ କୁମାର ଦାଶ, ଇଟିଭି ଭାରତ
