ବୌଦ୍ଧ : ନିର୍ମାଣ ଚାଲିଛି କେନାଲ ଉପରେ କଲଭର୍ଟ । ହେଲେ କଲଭର୍ଟ ନିର୍ମାଣ କାର୍ଯ୍ୟ ନସରୁଣୁ ଭୁଷୁଡି ଗଲାଣି ଦୁଇ ପାର୍ଶ୍ଵର ଆପ୍ରୋଚ ରାସ୍ତା । ଏଭଳି ଦୃଶ୍ୟ କୌଣସି ଉପାନ୍ତ ଅଞ୍ଚଳରେ ନୁହେଁ । ବୌଦ୍ଧ ଜିଲ୍ଲା ଜଳସେଚନ ବିଭିନ୍ନ କାର୍ଯ୍ୟାଳୟ ଠାରୁ ମାତ୍ର ଦୁଇ କିଲୋମିଟର ଦୂରରେ ଥିବା ଟୁଟୁସିଙ୍ଗା ଗ୍ରାମର ଦୃଶ୍ୟ । ଏଠାରେ ଗତ ଲଗାଣ ବର୍ଷାରେ ଶାଖା କେନାଲରେ ଘାଇ ହୋଇ କଲଭର୍ଟଟି ଧୋଇ ଯାଇଥିଲା ।
ଟୁଟୁସିଙ୍ଗା ଗ୍ରାମବାସୀଙ୍କ ବାରମ୍ବାର ଦାବି ପରେ ଉକ୍ତ ସ୍ଥାନରେ ଗତମାସରେ ଏକ ନୂତନ କଲଭର୍ଟ ନିର୍ମାଣ କାର୍ଯ୍ୟ ଆରମ୍ଭ ହେଲା । କିନ୍ତୁ ଆଶ୍ଚର୍ଯ୍ୟର କଥା କଲଭର୍ଟ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇନଥିବା ବେଳେ ଦୁଇ ପାର୍ଶ୍ଵର ଆପ୍ରୋଚ ରାସ୍ତା ଭାଙ୍ଗି ଭୁଷୁଡି ଗଲାଣି । ନିମ୍ନମାନର କାମ ଯୋଗୁଁ ରାସ୍ତାର ଏଭଳି ଅବସ୍ଥା ହୋଇଥିବା ଅଭିଯୋଗ ହୋଇଥିବା ବେଳେ ଏନେଇ ଟୁଟୁସିଙ୍ଗା ଗ୍ରାମବାସୀ ଗଭୀର ଅସନ୍ତୋଷ ପ୍ରକାଶ କରିଛନ୍ତି । ସେପଟେ ରାସ୍ତାରେ ଭାରିଯାନ ଚଳାଚଳ ଯୋଗୁଁ ଏଭଳି ପରିସ୍ଥିତି ହୋଇଥିବା ତଥା ଏନେଇ ପଦକ୍ଷେପ ଗ୍ରହଣ କରାଯିବ ବୋଲି ବିଭାଗୀୟ ଯନ୍ତ୍ରୀ ସୂଚନା ଦେଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
