ବୌଦ୍ଧ: ପୁଣି ସାମନାକୁ ଆସିଛି ସ୍ବାସ୍ଥ୍ୟବିଭାଗର ଏକ ନଗ୍ନ ଚିତ୍ର । ବୌଦ୍ଧ ଜିଲ୍ଲା ମୁଖ୍ୟ ଚିକିତ୍ସାଳୟ ସମ୍ମୁଖରେ ଶୁକ୍ରବାର ସଂଧ୍ୟାରେ ଏକ ଆସନ୍ନ ପ୍ରସବା ମହିଳା ସର୍ବ ସମ୍ମୁଖରେ ଏକ ଅଟୋ ମଧ୍ୟରେ ସନ୍ତାନ ପ୍ରସବ କରିଛନ୍ତି । ଏହାକୁ ନେଇ ସ୍ଥାନୀୟ ଅଞ୍ଚଳରେ ବିଭିନ୍ନ ପ୍ରକାରର ପ୍ରତିକ୍ରିୟା ପ୍ରକାଶ ପାଇଛି ।
ଶୁକ୍ରବାର ସନ୍ଧ୍ୟାରେ ସୁବର୍ଣ୍ଣପୁର ଜିଲ୍ଲାର ବୀରମହାରାଜପୁର ବ୍ଲକ ଅନ୍ତର୍ଗତ ପୀତାମହୁଲ ଗ୍ରାମର ଆସନ୍ନ ପ୍ରସବା ମହିଳା ଝିଲ୍ଲୀ ବାରିକଙ୍କ ବେଦନା ଆରମ୍ଭ ହେବାରୁ ସ୍ବାମୀ ସୁଶାନ୍ତ ତୁରନ୍ତ ୧୦୮ ଆମ୍ବୁଲାନ୍ସକୁ ଫୋନ କଲେ । କିନ୍ତୁ ଆମ୍ବୁଲାନ୍ସ ପହଞ୍ଚାଇବାରେ ବିଳମ୍ବ ହେବା ସୂଚନା ପାଇବା ପରେ ସେ ତୁରନ୍ତ ଏକ ଅଟୋ ଯୋଗେ ନିଜ ପତ୍ନୀ ଓ କିଛି ସମ୍ପର୍କୀୟଙ୍କୁ ସାଙ୍ଗରେ ନେଇ ବୌଦ୍ଧ ଡାକ୍ତରଖାନାରେ ପହଞ୍ଚିଥିଲେ । କିନ୍ତୁ ସେଠାରେ ପହଞ୍ଚିବା ପରେ ମଧ୍ୟ ତୁରନ୍ତ ପ୍ରସବାଙ୍କୁ କେହି ସହାୟତା କରି ନଥିଲେ ।
ଏପଟେ ସ୍ବାମୀ ସୁଶାନ୍ତ ଡାକ୍ତରଖାନାରେ କେତେକଙ୍କୁ ନେହୁରା ହେଉଥିବା ବେଳେ ଡାକ୍ତରଖାନାର ମୁଖ୍ୟ ଦ୍ବାର ସମ୍ମୁଖରେ ହିଁ ଉକ୍ତ ଅଟୋ ମଧ୍ୟରେ ମହିଳା ଜଣକ ଏକ ଶିଶୁ ପୁତ୍ରକୁ ଜନ୍ମ ଦେଇଥିଲେ । ଯାହାର ସମ୍ପୂର୍ଣ୍ଣ ଚିତ୍ର ଇଟିଭି ପ୍ରତିନିଧି ସଂଗ୍ରହ କରିବା ସହ ତୁରନ୍ତ ଆଶୁ ଚିକିତ୍ସା ନିମନ୍ତେ ଜଣେ ମହିଳା ସହାୟିକାଙ୍କୁ ଅନୁରୋଧ କରିଥିଲେ ।
କିଛି ସମୟ ପରେ ପ୍ରସବା ମହିଳା ଓ ନବଜାତ ଶିଶୁ ପୁତ୍ରକୁ ଡାକ୍ତରଖାନାକୁ ନିଆଯାଇ ଭର୍ତ୍ତି କରାଯାଇଥିଲା । କିନ୍ତୁ ଏବେ ଏଠାରେ ପ୍ରଶ୍ନ ଉଠେ ଯେ ଏତେ ସବୁ ଯୋଜନା ସତ୍ତ୍ବେ ଜଣେ ଆସନ୍ନ ପ୍ରସବା ମୁଖ୍ୟ ଚିକିତ୍ସାଳୟ ସମ୍ମୁଖରେ ସର୍ବସମ୍ମୁଖରେ ପ୍ରସବ ନିମନ୍ତେ ଦାୟୀ କିଏ ?
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
