ଭଦ୍ରକ: ସହରରେ ଆରମ୍ଭ ହୋଇଛି ପ୍ରସିଦ୍ଧ କାଳୀପୂଜା । ସାତ ଦିନ ଧରି ଚାଲିବାକୁ ଥିବା ଏହି ପୂଜାରେ ପ୍ରତିଦିନ ମା’ଙ୍କ ଭିନ୍ନ ଭିନ୍ନ ବେଶର ପୂଜାର୍ଚ୍ଚନା ହେବାର ବିଧି ରହିଛି । ଏନେଇ ପ୍ରତିଦିନ ମା’ ଶାନ୍ତ ବେଶରେ ଭକ୍ତଙ୍କୁ ଦର୍ଶନ ଦେଉଥିବାବେଳେ ସୋମବାର ମହାକାଳୀ ବେଶରେ ଭକ୍ତଙ୍କୁ ଦର୍ଶନ ଦେଇଛନ୍ତି । ଏଥିସହ ପୂଜା ଅବସରରେ ସହରରେ ଗୋଟିଏ ଦିନ ପାଇଁ ସରକାରୀ ଛୁଟି ଘୋଷଣା କରିଛନ୍ତି ଜିଲ୍ଲାପାଳ ।
ତେବେ ମା’ଙ୍କ ମହାକାଳୀ ବେଶ ପାଇଁ ସକାଳୁ ପହଡ ଖୋଲିବା ପରେ ମା’ଙ୍କର ନୀତିକାନ୍ତି ଆରମ୍ଭ ହୋଇଛି । ଦିନ ଯେମିତି ବଢିବ ଶ୍ରଦ୍ଧାଳୁଙ୍କ ସଂଖ୍ୟା ମଧ୍ୟ ବଢିବା ନେଇ ଅନୁମାନ କରାଯାଉଛି । ମା’ଙ୍କ ମହାକାଳୀ ବେଶରେ ଦର୍ଶନ କରିବା ପାଇଁ ଜିଲ୍ଲା ତଥା ଜିଲ୍ଲା ବାହାରୁ ଛୁଟିଛି ଭକ୍ତଙ୍କ ସୁଅ । ଅନ୍ୟପଟେ ଜିଲ୍ଲାର ଆଞ୍ଚଳିକ ପର୍ବ ପାଇଁ ସୋମବାର ଗୋଟିଏ ଦିନ ପାଇଁ ସରକାରୀ ଅନୁଷ୍ଠାନ ଗୁଡିକୁ ଛୁଟି ଘୋଷଣା କରିଛନ୍ତି ଜିଲ୍ଲାପାଳ ଜ୍ଞାନ ଦାସ ।
ସୋମବାର ମା’ଙ୍କର ମହାକାଳୀ ବେଶରେ ପୂଜାର୍ଚ୍ଚନା ହେଉଥିବାବେଳେ ମଙ୍ଗଳବାର ରାଜ ରାଜେଶ୍ବରୀ, ବୁଧବାର ସିଂହ ବାହିନୀ, ଗୁରୁବାର ଜଗଦ୍ଧାତ୍ରୀ, ଶୁକ୍ରବାର ମହା ସରସ୍ବତୀ ଓ ଶନିବାର ତଥା ଶେଷ ଦିନରେ ମା’ ମହାଲକ୍ଷ୍ମୀ ବେଶରେ ପୂଜା ପାଇବେ ।
ଭଦ୍ରକରୁ ଦେବାଶିଷ ମହାପାତ୍ର, ଇଟିଭି ଭାରତ
