ବରଗଡ: ଜିଲ୍ଲାରେ ହଟସ୍ପଟ ପାଲଟିଥିବା ବରଗଡ ବ୍ଲକର କଟାପାଳି ଗ୍ରାମ ଗତ 49 ଦିନ ହେବ କଣ୍ଟେନମେଣ୍ଟ ଜୋନ ଭାବେ ଘୋଷିତ ହୋଇଥିଲା । ଯାହା ରବିବାର କଣ୍ଟେନମେଣ୍ଟ ମୁକ୍ତ ହୋଇଛି । ଏନେଇ କଟାପାଳି ଗ୍ରାମ ଭିତରେ ଦୀର୍ଘ ଦିନ ହେବ ବନ୍ଦୀ ହୋଇ ରହିଥିବା ହଜାର ହଜାର ଗ୍ରାମବାସୀ ମୁକ୍ତ ହୋଇ ଆଶ୍ବସ୍ତି ପ୍ରକାଶ କରିଛନ୍ତି ।
ଜିଲ୍ଲାରେ ଚିହ୍ନଟ ମୋଟ ଆକ୍ରାନ୍ତଙ୍କ ମଧ୍ୟରୁ ଅର୍ଦ୍ଧାଧିକ ଏହି କଟାପାଳି ଗ୍ରାମରୁ ହୋଇଥିବା କାରଣରୁ ଗ୍ରାମକୁ କଣ୍ଟେନମେଣ୍ଟ ଜୋନ ଭାବେ ଘୋଷଣା କରାଯାଇଥିଲା । ଏଠାରେ କିଛି ଆକ୍ରାନ୍ତଙ୍କ ମୃତ୍ୟୁ ମଧ୍ୟ ହୋଇସାରିଛି । ସୂଚନା ଅନୁଯାୟୀ ଜିଲ୍ଲାରେ 430 ଜଣ ସଙ୍କ୍ରମିତ ଚିହ୍ନଟ ହୋଇଥିବା ବେଳେ କେବଳ କଟାପାଳି ଗ୍ରାମରେ ଏକାକୀ ପାଖାପାଖି 200 ସଂକ୍ରମିତ ରହିଛନ୍ତି ।
ତେବେ ବରଗଡ ସହରରୁ ମାତ୍ର 7 କିଲୋମିଟର ଦୂରରେ ରହିଥିବା ଏହି କଟାପାଳି ଗ୍ରାମରୁ ପ୍ରତିଦିନ ବରଗଡ ସହରକୁ ଲୋକେ କାମ ପାଇଁ ଆସୁଥିବା ବେଳେ ଲୋକଙ୍କ ସୁରକ୍ଷା ଦୃଷ୍ଟିରେ କଟାପାଳି ଗ୍ରାମକୁ ସଟଡାଉନ କରାଯାଇଥିଲା । କଟାପାଳି ଗ୍ରାମର ଚାରିପଟେ ସିଲ କରି ଦିଆଯାଇଥିବା ବେଳେ ସମସ୍ତ ଗ୍ରାମବାସୀ ଗ୍ରାମରେ ହିଁ ଦିନ କାଟୁଥିଲେ । ତେଣୁ ଦୀର୍ଘ 49 ଦିନ ପର୍ଯ୍ୟନ୍ତ ଅବରୋଧ ଅଞ୍ଚଳରେ ରହିବା ପରେ ରବିବାର କଟାପାଳି ଗ୍ରାମରୁ ପ୍ରଶାସନ ପକ୍ଷରୁ ଅବରୋଧ ହଟାଯାଇଛି ।
ବରଗଡରୁ ରାଜେଶ ସରାପ, ଇଟିଭି ଭାରତ
