ଢାକା: ବାଂଲାଦେଶରେ ଧିରେ ଧିରେ ଗମ୍ଭୀର ହେବାରେ ଲାଗିଛି କୋରୋନା ସ୍ଥିତି । ମେ’ ମାସ ଶେଷ ସୁଦ୍ଧା ଦେଶରେ ସ୍ଥିତି ନିୟନ୍ତ୍ରଣାଧୀନ ରହିଥିବା ବେଳେ କୋହଳ ହୋଇଥିଲା ଅନେକ କଟକଣା । ହେଲେ ଏହାର 2-3 ଦିନ ମଧ୍ୟରେ ପୁଣି ମୁଣ୍ଟ ଟେକିଥିଲା ସଂକ୍ରମଣ ଭଯ । ଦେଶରେ ବର୍ତ୍ତମାନ 45 ନୂଆ ରେଡ ଜୋନ ଚିହ୍ନଟ ହୋଇଥିବା ବେଳେ ହାତରୁ ଖସିବାରେ ଲାଗିଛି ପରିସ୍ଥିତି । ଏମିତିରେ ସ୍ଥିତିକୁ ନିୟନ୍ତ୍ରଣ କରିବା ସହ ସଂକ୍ରମଣ ରୋକିବା ପାଇଁ ରେଡ ଜୋନରେ ସୁରକ୍ଷା କଡାକଡି କରିବା ପାଇଁ ସେନା ଟ୍ରୁର ନିୟୋଜିତ କରାଯାଇଛି ।
ସରକାରୀ ନିର୍ଦ୍ଦେଶ ମୁତାବକ ଦେଶରେ ରୋହିଙ୍ଗ୍ୟା ଶରଣାର୍ଥୀ କ୍ୟାମ୍ପ ନିକଟସ୍ଥ ସ୍ଥାନମନାଙ୍କରେ ସଂକ୍ରମଣ ଭୟ ବଢି ଚାଲିଥିବାରୁ 45ଟି ଅଞ୍ଚଳକୁ ସପ୍ତାହେ ମଧ୍ୟରେ ରେଡ ଜୋନ ଘୋଷଣା କରାଯାଇଛି । ଏହି ଅଞ୍ଚଳଗୁଡିକରେ ସଂକ୍ରମଣ ରୋକିବା ପାଇଁ ଟେଷ୍ଟିଂ ଓ ଟ୍ରେସିଂ ପ୍ରକ୍ରିୟାକୁ ତ୍ବରାନ୍ବିତ କରାଯାଇଛି । ବର୍ତ୍ତମାନ ସେନା ଅଧିକାରୀମାନେ ପୂର୍ବ ରାଜାବଜାରରେ ପେଟ୍ରୋଲିଂ ଜୋରଦାର ରଖିଥିବା ଜଣା ପଡିଛି ।
ଅନ୍ୟପଟେ ଅନ୍ତଃସେବା ଜନସମ୍ପର୍କ ନିର୍ଦ୍ଦେଶାଳୟର ସୂଚନା ମୁତାବକ ଦେଶରେ ଚିହ୍ନଟ ରେଡ ଜୋନ ଗୁଡିକରେ ସେନା ଟ୍ରୁପ ଦ୍ବାରା ଯାଞ୍ଚ ଓ ପେଟ୍ରୋଲିଂ ପ୍ରକ୍ରିୟା ଜୋରଦାର କରାଯାଇଛି । ଆଗକୁ ଏହା ଅଧିକ କଡାକଡି କରାଯିବ । ତେବେ ସ୍ଥିତି ନିୟନ୍ତ୍ରଣ କରିବା ପାଇଁ ଦେଶରେ ପର୍ଯ୍ୟାୟକ୍ରମେ ଲକଡାଉନ ଲାଗୁ କରାଯାଇଛି । ଅନ୍ୟ ସ୍ଥାନମାନଙ୍କରେ ଆବଶ୍ୟକତାର ସାମଗ୍ରୀ ମହଜୁଦ କରାଇବା ସହ ବିଭାଗୀୟ ଅଧିକାରୀ ପ୍ରସ୍ତୁତି ଶେଷ କଲେ ସେଠାରେ ମଧ୍ୟ ଲକଡାଉନ ଲାଗୁ କରାଯିବ ।
ବର୍ତ୍ତମାନ ବାଂଲାଦେଶରେ କୋରୋନା ଆକ୍ରାନ୍ତ ସଂଖ୍ୟା 90,619ରେ ପହଞ୍ଚିଥିବା ବେଳେ ମୃତ୍ୟୁ ସଂଖ୍ୟା 1209ରେ ପହଞ୍ଚିଛି ।
@IANS
