ଇସଲାମାବାଦ:ଆତଙ୍କବାଦୀ ଓସାମା ବିନ୍ ଲାଡେନକୁ ଶହୀଦ କହି ବିବାଦ ଘେରରେ ଫସିଛନ୍ତି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ । ଏନେଇ ତାଙ୍କୁ ସମାଲୋଚନା କରିଛନ୍ତି ଆଫଗାନିସ୍ତାନର ନ୍ୟାସନାଲ ଡାଇରେକ୍ଟୋରେଟ ଅଫ ସିକ୍ୟୁରିଟିର ପୂର୍ବତନ ଅଧ୍ୟକ୍ଷ ରହମତୁଲ୍ଲାହ ନାବିଲ । ଇମ୍ରାନ ଖାନ ଆଇଏସଆଇ ଏବଂ ପାକିସ୍ତାନୀ ସେନାର ମିଲିଟାରୀ ଇଣ୍ଟେଲିଜେନ୍ସର ସାହାଯ୍ୟରେ ପାକିସ୍ତାନର ଶାସନ ଗାଦିରେ ବସିଛନ୍ତି ବୋଲି ସେ କହିଛନ୍ତି । ତେବେ ଏହାର ପ୍ରମାଣ ମଧ୍ୟ ଥିବା ଦାବି କରିଛନ୍ତି ସେ ।
ନାବିଲ ଏନେଇ ଟ୍ବିଟ କରି କହିଛନ୍ତି, ପାକ୍ ପ୍ରଧାନମନ୍ତ୍ରୀ ଇମ୍ରାନ ଖାନ ଆତଙ୍କବାଦୀ ଓସାମା ବିନ୍ ଲାଡେନ ସମ୍ପର୍କରେ ଯାହା ବି କହିଲେ ତାହା ନୂଆ କଥା ନୁହେଁ । ଇମ୍ରାନ କେବଳ ପାକିସ୍ତାନୀ ସେନାର ରଣନୀତି ଏବଂ ଚିନ୍ତାଧାରାକୁ ସମସ୍ତଙ୍କ ସାମ୍ନାରେ ରଖିଛନ୍ତି । ଇମ୍ରାନ ଖାନ ପୁଣିଥରେ ପାକିସ୍ତାନୀ ସେନା ଏବଂ ଆତଙ୍କବାଦୀଙ୍କ ମଧ୍ୟରେ ଥିବା ସାମରିକ ସମ୍ପର୍କର ଘୋଷଣା କରିଛନ୍ତି । ଏହା ସହିତ ସେ ବିଶ୍ବକୁ ସଙ୍କେତ ଦେଇଛନ୍ତି ଯେ, ପାକିସ୍ତାନ ଆତଙ୍କବାଦୀଙ୍କ ଭୂସ୍ବର୍ଗ ରହିଛି ଏବଂ ଆଗକୁ ମଧ୍ୟ ରହିବ ।
ସୂଚନାଯୋଗ୍ୟ ଯେ, ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ ନେଶନଲ ଆସେମ୍ବଲି ଭାଷଣ ଦେବା ସମୟରେ ଆତଙ୍କବାଦୀ ଓସାମା ବିନ ଲାଡେନକୁ ଶହୀଦ ବୋଲି କହିଥିଲେ । ସେ କହିଥିଲେ, ଆମେରିକା ପାକିସ୍ତାନରେ ପ୍ରବେଶ କରି ଲାଡେନକୁ ହତ୍ୟା କରି ତାକୁ ଶହୀଦ କରିଦେଲା । ଏଥିପାଇଁ ଆମେ ଲଜ୍ଜିତ ବୋଲି ସେ କହିଥିଲେ ।
ଆମେରିକା ପାକିସ୍ତାନରେ ପ୍ରବେଶ କରି ଓସାମା ବିନ ଲାଡେନକୁ ନିହତ କରିଥିଲା । ଆମେରିକାରେ 9/11 ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ଥିଲା ଅଲକାଏଦା ଆତଙ୍କବାଦୀ ସଂଗଠନର ମୁଖ୍ୟ ଲାଡେନ ।
