ପୁରୀ: ପୁରୀ ଜିଲ୍ଲାପାଳ ପିପିଲି ଦାନଗହୀରି ଗ୍ରାମ ପରିଦର୍ଶନ କରି ସେଠାରେ ଚାଲିଥିବା ଲକଡାଉନ ସ୍ଥିତି ପରଖିଥିଲେ । କୋରୋନା ପଜିଟିଭ ବାହାରିବା ପରେ ଉକ୍ତ ଅଞ୍ଚଳର ଲୋକଙ୍କୁ ବାହାରକୁ ଯିବାକୁ କଟକଣା ଥିବାରୁ ଲୋକ ମାନଙ୍କ ପାଇଁ କିଭଳି ସମସ୍ତ ଅତ୍ୟାବଶ୍ୟକ ଜିନିଷ ପ୍ରଶାସନ ସଠିକ ଭାବେ ଯୋଗାଇ ପାରିବ ସେ ନେଇ ସମୀକ୍ଷା କରିଥିଲେ ।
ପୁରୀ ଜିଲ୍ଲା ପିପିଲି ଟୋଲ ଗେଟ ଯେଭଳି କୌଣସି ଗାଡି ପ୍ରବେଶ ନ କରେ ଉପସ୍ଥିତ ଥିବା କର୍ମଚାରୀଙ୍କୁ ନିର୍ଦ୍ଦେଶ ଦେଇଥିଲେ । ସେହିପରି ସାମାଜିକ ନିରାପତ୍ତା ଯୋଜନା ଠିକରେ କିଭଳି ହୋଇପାରିବ ସେ ନେଇ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଥିଲେ । ଅନ୍ୟପଟେ ସାମାଜିକ ଦୂରତ୍ବକୁ ପାଳନ କରିବା ତଥା 6 ଫୁଟ ଦୂରତା ବଜାୟ ରଖିବା ପାଇଁ ଲୋକଙ୍କୁ ପୁରୀ ଜିଲ୍ଲାପାଳ କହିଛନ୍ତି । ଏହାକୁ ଉଲଂଘନ କଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ।
ସେହିପରି ଗ୍ରୋସରୀ ଦୋକାନୀ ମାନେ ଦୋକାନ ଆଗରେ 6 ଫୁଟ ବ୍ୟବଧାନରେ ଏକ ସର୍କଲ କରି ଲୋକଙ୍କୁ ଧାଡିରେ ସବୁ ଜିନିଷ ଦେବାକୁ ଜିଲ୍ଲାପାଳ କହିଛନ୍ତି। ଏହା ପ୍ରତ୍ୟେକ ଦୋକାନୀଙ୍କ ଦାୟିତ୍ବ ଭାବେ ବିବେଚନା କରାଯିବ । ଯେଉଁ ଦୋକାନରେ ଏହି ନିୟମ ଉଲଘଂନ ହେବ ଉକ୍ତ ଦୋକାନର ବ୍ୟବସାୟ ଲାଇସେନ୍ସ ବାତିଲ ସହ ଜୋରିମାନା ଆଦାୟ କରାଯିବ । ଆସନ୍ତା 14 ତାରିଖ ଯାଏଁ ଏହି ନିୟମ ପାଳନ ପାଇଁ ନିର୍ଦ୍ଦେଶ ଜାରି ହୋଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
